Policia e Kosovës, përkatësisht Drejtoria për Hetimin e Trafikimit të Narkotikëve (DHTN), ka realizuar dy operacione të ndara policore, të koduara “Pinku” dhe “Dora e Kapur”, si rezultat i të cilave janë arrestuar katër persona të dyshuar, ndërsa janë konfiskuar mbi 25 mijë euro para kesh, armë, automjete dhe sasi të konsiderueshme narkotikësh.
Sipas njoftimit të policisë në rastin e parë hetuesit e DHTN-së pas një pune operativo-hetimore në terren në lidhje me rastin e koduar “Pinku” më datë 14.01.2026 rreth orës 15:20 në rr. ”Xhemajl Mustafa“ në Fushë Kosovë, kanë identifikuar dhe lokalizuar të dyshuarin, i cili ishe me veturën e tij, ku është ndaluar dhe arrestuar ne flagrancë duke bërë shitblerje të substancave narkotike të dyshuarit tjetër.
“Gjatë kontrollit të personit të parë janë gjetur 2 qese të vogla të mbushura me substancë të dyshuar narkotike të llojit marihuanë me peshë : 2 gram, ndërsa gjatë kontrollit të dyshuarit të dytë dhe veturës së tij janë gjetur : 9 qese të vogla të mbushura me pluhur ngjyrë e bardhë e dyshuar substancë narkotike e llojit kokainë me peshë 4.9 gram , 8 qese të vogla të mbushura me substancë të dyshuar narkotike e llojit marihuanë me peshë 12.7 gram , para te gatshme në vlerë 475 euro që dyshohet se janë përfituar nga shitja e narkotikëve, si dhe dy telefona celular”, thuhet në njoftim.
Në lidhje me rastin është njoftuar Prokurori Kujdestar nga Departamenti i Krimeve të Rënda dhe në konsultim me te është kryer bastisje ne shtëpinë e të dyshuarit të parë, ku gjatë kontrollit janë gjetur dhe konfiskuar: Një armë e shkurtë; Një sasi e pluhurit të bardhë e dyshuar për narkotik të llojit kokainë me peshë 15.8 gram; 79 copa tableta të dyshuara për narkotik të llojit ekstazi me peshë 37.7 gram; Një sasi e narkotikut të dyshuar të llojit kokainë ngjyrë e kuqe me peshë 2.6 gram; Një sasi e narkotikut të dyshuar të llojit marihuanë me peshë 322.9 gram; Dy peshore digjitale që shërbejnë për matje në sasi të vogla dhe qese najloni të zbrazura që shërbejnë për paketimin e narkotikëve. Të dyshuarit pas intervistimit me urdhër të prokurorit kujdestar janë dërguar në mbajtje për 48-orë.
Ndërkaq, në rastin e dytë, po ashtu me 14 janar, DHTN, përkatësisht Sektori Qendror për Hetimin e Trafikimit me Narkotikë në Prishtinë ka realizuar operacionin e koduar“Dora e Kapur”.
Gjatë operacionit, në rrugën“Imzot Nikprelaj”, është kapur në flagrancë i dyshuari të cilit i janë gjetur dhe sekuestruar 6 doza të lëndës narkotike të llojit heroinë, me peshë totale 4 gramë. Më pas, gjatë kontrollit në banesën e të dyshuarit janë gjetur dhe sekuestruar rreth 9 gramë hashash (çokollatë) dhe 18 gramë marihuanë.
“Në vijim, është bastisur banesa e të dyshuarit të parë, ku janë gjetur dhe sekuestruar: Substancë narkotike e dyshuar për heroinë (52 paketime me peshë totale 14 gramë), një pushkë gjuetie me 9 fishekë, Para të gatshme rreth 25,160 euro; Një veturë; Një peshore; Dy telefona mobil si dhe prova të tjera materiale që ndërlidhen me veprën penale’, thuhet në njoftim.
Policia e Kosovës thekson se DHTN do të vazhdojë me përkushtim luftimin e trafikimit me narkotik dhe sjelljen para drejtësisë të të gjithë kryerësve të këtyre veprave penale.
