Policia e Kosovës ka evidentuar një numër shqetësues të automjeteve të paregjistruara në rajonin e Prishtinës gjatë dy javëve të para të këtij viti.
Sipas të dhënave zyrtare të publikuara nga Policia, 353 automjete janë identifikuar duke qarkulluar pa regjistrim, një dukuri që, sipas autoriteteve, rrezikon drejtpërdrejt sigurinë e trafikut rrugor.
Policia vlerëson se automjetet e paregjistruara paraqesin rrezik të shtuar, pasi ato nuk i nënshtrohen kontrollimit teknik dhe mund të kenë defekte që ndikojnë në sigurinë e pjesëmarrësve në trafik, veçanërisht në kushtet e dimrit.
“Përveç shkeljeve të shpejtësisë, një nga sfidat kryesore mbetet numri i lartë i automjeteve të paregjistruara, të cilat qarkullojnë pa kontroll teknik dhe rrisin rrezikun për aksidente”, thuhet në njoftimin e Policisë së Kosovës.
Gjatë së njëjtës periudhë, Policia ka ndërmarrë veprime të shtuara kontrolli, duke shqiptuar 1.883 gjoba për kundërvajtje të ndryshme në trafik në rajonin e Prishtinës.
