Autoritetet lituaneze akuzuan të premten shërbimin e inteligjencës ushtarake GRU të Rusisë për planifikimin e një përpjekjeje për zjarrvënie në një fabrikë që furnizon skanerë me valë radioje ushtrinë ukrainase. Gjashtë shtetas të Spanjës, Kolumbisë, Kubës, Rusisë dhe Bjellorusisë janë arrestuar dhe akuzuar për sulmet e vitit 2024, dhe secili prej tyre përballet me deri në 15 vjet burg nëse dënohet, u tha gazetarëve prokurori i lartë Arturas Urbelis.
Koordinimi nga Rusia
“Krimet ishin të koordinuara dhe urdhrat për autorët u dhanë nga një grup njerëzish që jetonin në Rusi dhe të lidhur me GRU-në ruse”, tha Saulius Briginas, zëvendësdrejtor i Policisë Kriminale Lituaneze. Grupi që koordinoi sulmin përbëhej nga qytetarë kolumbianë dhe kubanë që jetonin në Rusi. Ata kishin tentuar sulme të ngjashme zjarrvënëse në Poloni, Rumani dhe Republikën Çeke, tha Briginas.
Shënjestrat e tyre ishin infrastruktura e naftës në Rumani, depot e ndërtimit në Poloni dhe autobusët, një zyrë postare dhe një kinema në Republikën Çeke.
Urdhër arresti ndërkombëtar
Lituania ka lëshuar urdhër-arreste ndërkombëtare për tre persona të tjerë dhe po përpiqet të ekstradojë një të katërt që u arrestua në Kolumbi. Të gjashtë të arrestuarit kishin lidhje me Rusinë, ku ata studiuan, udhëtuan ose kishin njohje. Të dyshuarit u paguan midis 5,000 dhe 10,000 euro për të marrë pjesë në sulme. “Autorët ishin kryesisht të motivuar nga paratë”, tha Urbelis.
Vitin e kaluar, Lituania fajësoi Rusinë për një përpjekje për t’i vënë flakën një qendre tregtare IKEA. Muajin e kaluar, prokurorët polakë akuzuan në mungesë rusin për udhëheqjen e një grupi sabotatorësh dhe spiunësh, si pjesë e një fushate që synonte kundërshtimin e mbështetjes për Ukrainën. Moska deri më tani nuk ka reaguar ndaj akuzave të fundit dhe më parë ka hedhur poshtë pretendimet për sabotim, duke thënë se Perëndimi po ushqen ndjenjat anti-ruse.
