Në përvjetorin e përjetësimit të veprimtarëve shqiptarë, vëllezërit Jusuf e Bardhosh Gërvalla dhe Kadri Zeka, presidentja Vjosa Osmani, kryeministri në detyrë Albin Kurti dhe kryeparlamentari Dimal Basha kanë bërë nderime pranë lapidarit të tyre dhe të nënës Ajshe.
Krerët e shtetit vlerësuan lart veprën dhe heroizmin e veprimtarëve, të cilët dhanë kontribut të jashtëzakonshëm për kauzën shqiptare për liri dhe pavarësi.
Presidentja e vendit, Vjosa Osmani tha se 17 janari është një prej ditëve më të kobshme për popullin e Kosovës, është dita kur u vranë mizorisht Jusuf e Bardhosh Gërvalla dhe Kadri Zeka.
“Një ditë e humbjeve të shumëfishta, por njëkohësisht një ditë e një krenarie të madhe për kombin tonë. Ata u shndërruan në zërin e një populli të robëruar dhe në kohë shumë të rënda rrezikuan gjithçka dhe u shndërruan në flakadanë të lirisë. Ishte sakrifica e tyre që e trasoi rrugën përpara të popullit tonë në mënyrë që ne sot ta gëzojmë këtë shtet për të cilin ata dhanë gjithçka”, tha presidentja.
Kurti tha se sot bëjmë nderime, duke kujtuar se si, edhe para suprimimit të autonomisë, gjatë gjithë kohës kemi pasur patriotë të jashtëzakonshëm, veprimtarë të paepur, të cilët u flijuan duke sakrifikuar gjithçka për shtetin dhe lirinë, të cilën e kemi dhe e gëzojmë sot.
“Edhe para luftës, shqiptarët nën Jugosllavi e Serbi nuk kishin paqe dhe për këtë janë dëshmi edhe demonstratat e shumta të organizuara, por gjithashtu edhe ish-të burgosurit e të persekutuarit politikë”, u shpreh kryeministri.
Atentati ndaj vëllezërve Gërvalla dhe Kadri Zekës ndodhi më 17 janar, 44 vjet më parë, në Untergruppenbach të Gjermanisë, ku sipas policisë gjermane, ndaj tyre u shtinë 12 herë. Raportohet se Jusuf Gërvalla mbeti i vetëdijshëm deri në momentet e fundit dhe përmendi UDB-në si përgjegjëse për këtë atentat.
Veprimtarët mbeten figura të shquara të historisë së rezistencës shqiptare dhe simbol i përkushtimit ndaj lirisë dhe pavarësisë së kombit.
