Pas funksionalizimit me Serbinë të Komisionit për Personat e Pagjetur gjatë luftës në Kosovë, kryenegociatori Besnik Bislimi në një intervistë dhënë për RTK-në tha se sot u arrit një sukses.
“Pjesa më e madhe e kohës sonë ka kaluar me takime bilaterale, fillimisht pala kosovare me Bashkimin Evropian dhe pastaj pala serbe. Qëllimi ishte që të arrijmë dakordim që sot të funksionalizojmë Komisionin e përbashkët për zbatimin e marrëveshjes për personat e pagjetur, në mes të kryeministrit Kurti dhe presidentit Vuçiq. Takimet ishin të suksesshme dhe në fund arritëm që përfundimisht ta jetësojmë këtë objektiv”, deklaroi ai.
Bislimi tha se në javët e ardhshme do të takohen zëvendësit e dialogut dhe do të bëhet përcaktimi i prioriteteve të para të këtij komisioni.
“Kjo temë ka qenë kryesorja. Në pika të shkurtra janë prekur edhe elementet e tjera për të cilat pritet lëvizje në të ardhmen pas formimit të qeverisë”, deklaroi Bislimi.
Marrëveshja u arrit pasi Peter Sørensen zhvilloi takime të ndara dhe të gjata me të dy kryenegociatorët.
