Vrasja e teknikut mjekësor 37-vjeçar Alex Pretti në Minneapolis ka shkaktuar një skandal të ri të madh në Amerikë.
Ndërsa Donald Trump dhe Komisioneri i Policisë së Imigracionit Greg Bovino e përshkruajnë Prettin si një sulmues të armatosur që kërcënoi të “masakërojë” agjentët, deklaratat e reja të dëshmitarëve dhe pamjet filmike tregojnë një histori krejtësisht të ndryshme.
Në deklaratat e dhëna policisë, dy dëshmitarë kyç pohojnë se Pretti nuk ishte i armatosur.
Gruaja që filmoi momentet fatale përshkroi se si Pretti po përpiqej thjesht të ndihmonte gruan që u rrëzua përtokë nga agjentët. “Ai as nuk po i shikonte përballë, ai po përpiqej thjesht ta ndihmonte të ngrihej. Në vend të një arme, ai kishte një kamerë në duar”, tha dëshmitari, duke shtuar se agjentët e spërkatën me gaz lotsjellës, e hodhën përtokë dhe më pas qëlluan një sërë të shtënash drejt tij ndërsa ai ishte plotësisht i palëvizshëm.Një mjek që jeton aty pranë i konfirmoi këto akuza, duke vënë në dukje se nuk pa asnjë armë në duart e viktimës. Detajet e veprimeve të agjentëve pas të shtënave janë veçanërisht shqetësuese. Doktori pohon se agjentët fillimisht e ndaluan atë të ofronte ndihmë për burrin që po vdiste. “Asnjë nga agjentët nuk i kreu CPR. Duket sikur ata thjesht po qëndronin mbi të dhe po numëronin plagët e plumbave”, thuhet në dëshminë e tij
Një analizë e pamjeve filmike në dispozicion, e kryer nga The Guardian , nuk tregon asnjë provë që Pretti ishte i armatosur ose po planifikonte një sulm. Pamjet sugjerojnë që Pretti, ashtu si shumë banorë të tjerë të Minneapolis, thjesht po regjistronte aktivitetet e agjentëve me celularin e tij, gjë që është një e drejtë ligjore në SHBA.
Guvernatori i Minesotës, Tim Walz, ka sulmuar ashpër Departamentin e Sigurisë Kombëtare (DHS), duke e akuzuar atë për përhapjen e gënjeshtrave të rrezikshme. “Falë Zotit që i kemi pamjet filmike sepse historia se shtatë ‘heronj’ sulmuan një batalion të tërë është thjesht absurditet dhe gënjeshtër”, tha Walz.Shefi i Policisë së Minneapolis, Brian O’Hara, gjithashtu u distancua nga forcat federale, duke theksuar se Pretti ishte një qytetar shembullor me leje për të mbajtur armë dhe se DHS po refuzonte t’i jepte atij detaje specifike rreth incidentit.
