Gjykata Speciale ka njoftuar se më 29 janar 2026, Paneli i Gjykatës së Apelit në çështjen Prokurori i Specializuar kundër Pjetër Shalës lëshoi vendimin e parë mbi apelin kundër urdhrit për zhdëmtim.
Sipas njoftimit, Paneli i Apelit, i përbërë nga gjykatësit Mishelë Pikar, Kai Ambos dhe Nina Jorgensen, “la në fuqi urdhrin për zhdëmtim të Trupit Gjykues kundër z. Shala”, pas shpalljes së tij fajtor “për krimet e luftës të ndalimit arbitrar, torturës dhe vrasjes së paligjshme”.
“Në tërësi, tetë viktima morën pjesë në proces dhe kërkuan zhdëmtim”, ndërsa “më 29 nëntor 2024, Trupi Gjykues urdhëroi z. Shala të paguajë shumën prej 208,000 euro si kompensim për dëmin fizik, mendor dhe material që pësuan viktimat pjesëmarrëse”, thuhet në njoftim.
Gjykata Speciale njoftoi se apeli i Shalës “përmbante pesë pika”, duke pretenduar gabime në “interpretimin e ligjit të shkakësisë”, në “vlerësimin e provave që mbështesin dëmin material” si dhe në “vlerësimin e përgjegjësisë së tij për zhdëmtime”. Ai po ashtu kishte kërkuar që “shqyrtimi i apelit kundër Urdhrit për Zhdëmtim të pezullohej” deri në përfundimin e apelit kundër verdiktit të fajësisë dhe dënimit.
Sipas njoftimit, Paneli i Apelit “i rrëzoi të pesë pikat duke mos konstatuar gabime në interpretimin e ligjit apo në vlerësimin e provave prej Trupit Gjykues”. Po ashtu, u vlerësua se kërkesa për pezullim ishte e tejkaluar, “për shkak të përfundimit të aktgjykimit të apelit në lidhje me themelësinë, i lëshuar më 14 korrik 2025”.
Në përfundim, Gjykata Speciale theksoi se Paneli konstatoi që “procesi i zhdëmtimit nuk e dëmtoi Shalën, as nuk shkeli të drejtën e tij për procedim të drejtë dhe të shpejtë”.
