Kanë nisur hetimet për grupin e dytë të dyshuarve në Prizren për manipulime me vota në Qendrën Komunale të Numërimit, pavarësisht arrestimit të mbi 100 personave një javë më parë.
“Hetimet kanë të bëjnë me dyshimet për kryerjen e veprave penale të parashikuara në Kapitullin XVIII lidhur me shkeljen e të drejtave të votimit dhe Kapitullit XXXIII Korrupsioni zyrtar dhe veprat penale kundër detyrës zyrtare, të Kodit Penal të Republikës së Kosovës (KPRK)”, thuhet në njoftimin e Policisë së Kosovës, për aksionin e përbashkët me Prokurorinë Themelore në Prizren.
Këto intsitucione bëjnë të ditur se gjatë ditës do të dalin me komunikatë për media. Aksioni paraprak në këtë komunë kishte rezultuar me arrestimin e 109 të dyshuarve. Ky qe një nga aksionet më të mëdha të arrestimeve të Policisë së Kosovës dhe bashkëpunimit ndërinstitucional.
Hetimet do të shtrihen në çdo komunë të Kosovës, teksa dje 58 persona janë ndaluar në Malishevë për manipulim votash sot, prej tyre 15 kryesues e 43 komisionerë.
