Për herë të parë në Stamboll është mbajtur konferenca ekonomike e organizuar nga Rrjeti Global i Bizneseve Shqiptare në Turqi. Kryetari i këtij rrjeti, Muhamed Sherifi, tha se qëllimi kryesor i konferencës është rritja e bashkëpunimit ndërmjet bizneseve shqiptare.
Në konferencë pati prezantime projektesh, takime B2B dhe sesione diskutimi nga biznese të shumta nga Kosova, Shqipëria, Maqedonia e Veriut, Lugina e Preshevës dhe shtete të tjera evropiane.
Kryetari i Rrjetit Global të Bizneseve Shqiptare, Omer Nura, theksoi se ky rrjet është shndërruar në një urë lidhëse mes bizneseve dhe se në muajt e ardhshëm do të organizohen forume dhe konferenca të ngjashme edhe në shtete të tjera, me qëllim të forcimit të bashkëpunimit dhe rritjes së eksporteve të produkteve vendore në tregjet evropiane dhe më gjerë.
Diplomatja e Kosovës në Stamboll, Merita Maliqi, theksoi se Turqia është një partner shumë i rëndësishëm i Kosovës në aspektin ekonomik dhe tregtar, por jo vetëm.
Në këtë konferencë morën pjesë edhe kryetari i Kuvendit të Maqedonisë së Veriut, Afrim Gashi, si dhe konsulli i përgjithshëm i Shqipërisë në Stamboll, Armand Shandro. Sipas Sherifit, rreth 15 për qind e bizneseve në Turqi janë me prejardhje shqiptare, çka dëshmon se ekzistojnë mundësi të shumta për rritjen e bashkëpunimit ekonomik dhe tregtar.
