Presidentja Vjosa Osmani ka vlerësuar paraqitjen e dy skitarëve tanë në ceremoninë e hapjes solemne të Lojërave Olimpike Dimërore “Milano-Cortina 2026”. Ajo ka thënë se flamuri i Republikës së Kosovës u valëvit me krenari në hapjen madhështore të këtyre lojërave, teksa i ka dhënë mbështetje dy përfaqësuesve të Kosovës në këtë Olimpiadë.
“Kiana Kryeziu dhe Drin Kokaj, dy skitarët tanë, përfaqësojnë Kosovën me dinjitet, guxim dhe ëndrra të mëdha. Kosova është me ju, sot, nesër dhe gjithmonë! Ju priftë fati e u kthefshin faqebardhë”, ka shkruar presidentja Osmani në Facebook.
Në Lojërat Olimpike Dimërore Milano–Cortina 2026 marrin pjesë rreth 2.800 sportistë nga 92 shtete të botës.
Radiotelevizioni i Kosovës, si transmetues ekskluziv për territorin e Kosovës, do të ofrojë mbi 125 orë program olimpik deri më 22 shkurt, duke sjellë nga afër emocionet, garat dhe emocionet e Lojërave Olimpike Dimërore ‘Milano–Cortina 2026’.
