Është nënshkruar Memorandumi i Bashkëpunimit ndërmjet Odës Ekonomike të Kosovës dhe Universitetit të Gjakovës “Fehmi Agani”.
Me qëllim për të përforcuar bashkëpunimin ndërmjet sektorit privat dhe akademisë në Kosovë, Kryetari i Odës Ekonomike të Kosovës, Lulzim Rafuna, së bashku me Rektorin e Universitetit të Gjakovës, Drilon Bunjaku, kanë nënshkruar Memorandumin e Bashkëpunimit dypalësh.
Sipas komunikatës, ky memorandum ka për qëllim themelimin e një partneriteti strategjik.
“Ky memorandum ka për qëllim themelimin e një partneriteti strategjik që do të inkurajojë shkëmbimin e njohurive, zhvillimin e projekteve të përbashkëta, si dhe promovimin e inovacionit dhe zhvillimit ekonomik”, thuhet në komunikatë.
Rafuna potencoi se është bërë një hap i rëndësishëm drejt përmirësimit të bashkëpunimit, bashkëpunim ky i cili do të sjellë avantazhe të mëdha për të dyja palët dhe do të kontribuojë në rritjen e nivelit të dijes dhe inovacionit në shoqëri.
Me nënshkrimin e këtij memorandumi, pritet që të fillojnë projekte konkrete dhe hapa të tjerë për të thelluar bashkëpunimin në fushat e përbashkëta të interesit. /Kosovatimes/
