Kryetari i Bashkimit Demokratik për Integrim, Ali Ahmeti, ka thënë se zgjedhja e Talat Xheferit, për kryeministër të Maqedonisë së Veriut, si kryeministër i parë shqiptar, është historike.
Ahmeti tha se kjo ngjarje është e rëndësishme, sa për shqiptarët, aq edhe për maqedonasit, si dhe për të gjithë të tjerët, sepse, shtoi ai, “po bëhemi shtet dhe shoqëri e barabartë dhe po tejkalojmë të gjitha paragjykimet.”
Tutje, Ahmeti u shpreh i bindur se bashkërisht po ndërmarrin përgjegjësinë për t’i prirë vendit, sikundër tha ai, jo njëri pas tjetrit, por krah më krah, bashkë, për një Maqedoni Evropiane.
“Kjo ditë është historike sa për shqiptarët, aq edhe për maqedonasit, si dhe për të gjithë të tjerët, sepse po bëhemi shtet dhe shoqëri e barabartë dhe po tejkalojmë të gjitha paragjykimet. Bashkërisht po ndërmarrim përgjegjësinë për t’i prirë vendit, jo njëri pas tjetrit, por krah më krah, bashkë, për një Maqedoni Evropiane”, ka deklaruar Ahmeti.
Më tej, ai tha se është optimist se e ardhmja e Maqedonisë së Veriut do të jetë evropiane, duke shtuar se do të angazhohet për një Maqedoni pro-evropiane e jo pro-ruse, për, siç tha ai, brezat e rinj.
Por për të arritur këtë, Ahmeti shtoi se “sot kemi nevojë të bashkohemi, t’ia shtrijmë dorën njëri tjetrit, të lëmë anash gjërat që na ndajnë dhe të bashkohemi rreth gjërave që na afrojnë”.
Ndryshe, presidenti i Maqedonisë së Veriut, Stevo Pendarovski, i ka dorëzuar Talat Xhaferit, ish-kryetar i Kuvendit, mandatin për formimin e Qeverisë teknike.
Xhaferi e pranoi këtë mandat dhe u zotua për angazhim, kurse Qeveria gjithëpërfshirëse pritet të votohet të dielën. Ndërkaq me 64 vota për dhe asnjë kundër, deputetët zgjodhën Jovan Mitrevskin, për kryetar të Kuvendit të Maqedonisë së Veriut.
