Ndaj vendimit të Gjykatës Themelore është shprehur i befasuar lideri i AAK-së, ish-kryeministri Ramush Haradinaj.
“Dua të besoj fuqishëm në sistemin e drejtësisë dhe në Gjykatën e Apelit e cila do ta zbardhë të vërtetën dhe do ta shkarkojë nga çdo akuzë ish-ministrin Lekaj. Çdo person është i pafajshëm deri në një vendim të formës së prerë! I bindur në pafajësinë e kolegut Lekaj”, ka shkruar Haradinaj në Facebook.
Ndërsa, deputeti Pal Lekaj në një deklaratë për RTK-në, ka thënë se ky është vendim i padrejtë dhe i pabazuar.
Tutje ai ka thënë se asnjëherë nuk i ka tejkaluar kompetencat dhe se nuk e ka keqpërdorur pozitën e ministrit, kjo as në rastin e Autostradës “Arbën Xhaferi”.
Lekaj ka bërë të ditur se do ta ankimojë vendimin në Apel, derisa është shprehur i bindur në pafajësinë e tij. /Kosovatimes/
