Ministri i Mbrojtjes, Ejup Maqedonci, ka takuar ministrin Federal të Mbrojtjes së Gjermanisë, Boris Pistorius, me të cilin ka diskutuar rreth situatës së sigurisë në vend, zbatimin e planit bilateral, si dhe fushat me interes në të cilat mund të zgjerojnë bashkëpunimin ushtarak.
Ministri Maqedonci ka bërë të ditur se homologun gjerman e ka njoftuar për fazën në të cilën është FSK-ja sa i përket implementimit të Planit Gjithëpërfshirës të Tranzicionit, zhvillimin e FSK-së, dhe synimin e qartë për t’u anëtarësuar në NATO.
“Ne gjithmonë jemi për paqe, dhe në funksion të saj jemi të përgatitur për mbrojtjen. Investimet e vazhdueshme në avancimin e kapaciteteve profesionale dhe operacionale përmes shkollimit dhe trajnimit të ushtarakëve, si dhe investimet në armatime sipas standardeve të NATO-s, janë hapat e sigurt që po ndërmarrim për të garantuar përmbushjen e misionit kushtetues të FSK-së në mbrojtjen e tërësisë territoriale të Kosovës, sigurisë së qytetarëve, dhe ofrimit të mbështetjes në çdo mision përkrah partnerëve tanë strategjik”, ka bërë të ditur Maqedonci.
Ai ka bërë të ditur se ka falënderuar ministrin Pistorius për mbështetjen e vazhdueshme që Konfederata Federale e Gjermanisë i ka ofruar Kosovës në secilën etapë të shtetndërtimit, e veçanërisht për mbështetjen e ofruar në aspektin ushtarak përmes shkollimit të ushtarakëve tanë si dhe donacioneve.
Të dy ministrat janë dakorduar që tani kur bota përballet me luftë hibride, kur po kërcënohen vlerat demokratike perëndimore, bashkëpunimi ndërmjet dy shteteve duhet thelluar për të ruajtur stabilitetin dhe paqen. /Kosovatimes/
