Shkolla fillore “Pavarësia” në Prishtinë, e konsideron moment të veçantë për komunitetin tonë shkollor festimin e 15-vjetorit të Ditës së Shkollës së tyre dhe 16-vjetorin e shtetësisë së Kosovës.
“Emri i shkollës përmban në vete një thelb simbolik, duke kujtuar çdo vit shpalljen e sovranitetit të vendit tonë. Kjo ditë është një festë e dyfishtë, e cila përshkruhet me gëzim dhe përkushtim nga të gjithë nxënësit dhe mësimdhënësit tanë. Aktivitetet e organizuara për këtë rast shënojnë një angazhim të jashtëzakonshëm dhe kreativ të të gjithë pjesëmarrësve”, thekson kjo shkollë në një publikim në profilin e saj ne facebook.
“Shkolla më dyer të hapura”, u ofroi prindërve dhe mysafirëve një përvojë të veçantë, duke i njohur ata me sukseset dhe inovacionet e nxënësve tanë në çdo fushë të kurrikulës.
Prezantimet dhe eksperimentet e ndryshme shënuan një shfaqje të vërtetë të talentit dhe aftësive të tyre.
Mirënjohje është ndarë nga shkolla për dy mësimdhënëse dhe për nxënësit e shkollës, ku për çdo klasë është zgjedhur një nxënës për të përfaqësuar suksesin dhe përpjekjet e tyre.
“Kjo tregon përkushtimin e shkollës ndaj vlerave të arsimit dhe ndihmës së nxënësve në zhvillimin e tyre. Nëpërmjet këtij falënderimi, shkolla vlerëson dhe inkurajon përpjekjet e të gjithë pjesëmarrësve në komunitetin shkollor. Aktivitetet që u zhvilluan brenda dhe jashtë shkollës treguan një përkushtim të vazhdueshëm për të festuar dhe për të përjetuar momente të veçanta të historisë sonë kombëtare. Prania e ish-presidentit të Kosovës, z. Fatmir Sejdiu, dhe e drejtoreshës së arsimit, znj. Jehona Lushaku, shtoi një dimension shtesë të nderit dhe krenarisë për festimin tonë. Ne shprehim një falënderim të veçantë për ta dhe për të gjithë ata që bashkëfestuan këtë ditë të rëndësishme për shkollën tonë. Gëzuar Pavarësia e Kosovës!”, shkruan ShFMU “Pavarësia”. /Kosovatimes/
