Pas 22 muajve aplikimi i Suedisë në NATO është miratuar. Në mediet botërore procesi cilësohet si i stërzgjatur, por mesazhi është historik. Deti Baltik tani quhet “Deti i NATO-s”.
Parlamenti i Hungarisë miratoi përfundimisht dje kërkesën e Suedisë për NATO. Diçka që është pritur mirë nga vendet fqinje.
“Ne mezi presim të sjellim fqinjin tonë në aleancë. Kjo ardhje kompleton edhe anëtarësimin tonë”, shkruan presidenti në largim i Finlandës, Sauli Niinistö në X, njoftojnë mediet skandinave, transmeton RTKlive.
Kryeministri norvegjez Jonas Gahr Støre e përshkruan njoftimin si historik.
“Që vendet nordike t’i bashkohen NATO-s, është historike. Është një forcë e re për sigurinë tonë, për NATO-n dhe për nordikët”, ka shkruar ai në X.
Megjithatë, Jonathan Wolfe i New York Times është kritik ndaj procesit të tejzgjatur.
“Procesi i stërzgjatur për të arritur në këtë pikë lë një shije të hidhur dhe nuk do të ndryshojë reputacionin e Orbanit si një ngatërrestar më i interesuar për të qetësuar Putinin, sesa për të mbështetur Aleancën,” shkruan ai.
“Deti i Natos”
Me Suedinë, si anëtare e re, të gjitha vendet përreth Detit Baltik janë anëtarë të aleancës, përveç Rusisë. Kjo do të thotë se Deti Baltik tani përshkruhet si një “Det i NATO-s” njofton ‘Daily Mail’.
“Nëse shikoni hartën, Deti Baltik gjeografikisht bëhet një Det i NATO-s”, thotë Minna Alander, studiuese në Institutin Ndërkombëtar Finlandez për ‘Daily Mail’, transmeton RTKlive.
Edhe ‘Politico’ është gjithashtu në të njëjtën rrugë me titullin “Më falni Rusi, Deti Baltik tani është det i NATO-s”.
“Suedia dhe Finlanda e bëjnë NATO-n shumë më koherente gjeografikisht. Deti Baltik bëhet një det i NATO-s, i cili është përgjithësisht i dobishëm, edhe për shkak të rritjes së ndikimit të tij”, tha për gazetën Ulrike Franke, studiuese e lartë në Këshillin Evropian për Punët e Jashtme.
Një lamtumirë e gjatë
Miratimi i tërhequr vjen në një kohë kur aleatët e NATO-s po përpiqen të unifikojnë mbështetjen për Ukrainën dhe të ruajnë besimin, pavarësisht kërcënimeve të Donald Trump për të ardhmen e mundshme të NATO-s.
“Kur, më në fund, aleatët të mblidhen në selinë e NATO-s, në Bruksel, për të ngritur flamurin e Suedisë, sigurisht që do të ketë festë, por edhe ata janë të rraskapitur dhe psherëtijnë me lehtësim”, shkruan ‘Washington Post’, transmeton RTKlive.
‘The Guardian’ shkruan se Suedia tani ka marrë një lamtumirë të gjatë ndaj neutralitetit, cituar nga Robert Dalsjö, analist i lartë në FOI.
Sipas tij, është një proces që ka filluar tashmë në fund të Luftës së Ftohtë dhe Suedia ka aplikuar për anëtarësim në BE.
