Shefi i grupit parlamentar të AAK-së, Besnik Tahiri, ka drejtuar kritika ndaj qeverisë Kurti, duke përmendur rënien ekonomike, mbylljen e bizneseve e raportet me aleatët ndërkombëtarë.
“Kjo Qeveri me retorikën e vet të luftës, me konfliktin e hapur me bashkësinë ndërkombëtare duke e mbajtur Kosovën nën sanksione, dhe duke mos pasur asnjë investim të huaj të mirëfilltë në vend, është duke e bankrotuar Kosovën. Dhe, të rinjtë po detyrohen t’ia mësyjnë migrimit”, ka shkruar ai në Facebook.
Tutje Tahiri ka shkruar se Kosova po përjeton tronditje ekonomike, pasi qindra biznese të vogla janë detyruar të mbyllen për shkak të mungesës së konsumit.
“Informatat e para të tremujorit të parë të vitit 2024 rreth qarkullimit të bizneseve që operojnë në Kosovë janë alarmante. Fuqia blerëse ka rënë nga 15% deri në 50%. Me mbylljen e bizneseve do të shkojmë drejt rritjes së papunësisë në Kosovë që ndikon në rritjen e varfërisë dhe në uljen e nivelit të jetesës për qytetarët”, ka shkruar Tahiri. /Kosovatimes/
