Pak ditë para se të përmbyllet afati i përcaktuar nga qeveria për konvertimin e targave ilegale ne ato shtetërore, Lidhja Demokratike e Kosovës i ka bërë thirrje për përgjegjësi Qeverisë së Kosovës.
Në një konferencë për media, deputeti Armend Zemaj tha se nuk është kohë e lojërave, por e përgjegjësisë dhe bashkëpunimit.
“Nuk është koha e lojërave, nuk është koha e mbulesës së dështimeve edhe në procesin e dialogut. Është koha e vendimmarrjes, e bashkëpunimit me partnerët ndërkombëtar, por edhe me partitë opozitare edhe pse për qeverinë duken të vogla nga arroganca e numrave, por janë të rëndësishme për proceset integruese që kalon Kosova”.
Tutje, ai tha se qëndrimet LDK-së janë të njohura për dialogun dhe për transparencën e munguar, duke shtuar se nuk i dinë detajet, se çka dhe nëpër çka, po kalon Republika e Kosovës në këtë proces.
“Kjo është vetëm nga papërgjegjësia ose nga injoranca, arrogance a e kësaj qeverie në shumë procese të ndërlikuara. Në ditët në vazhdim kemi edhe një vendim që duket që do të krijojë një situatë të re edhe një momentum të ri edhe në procesin e dialogut, por edhe në procesin e brendshëm integrues të komuniteteve pakicë që jetojnë në Kosovë”, tha ai.
I pyetur nëse duhet të shtyhet afati, Zemaj tha se LDK nuk është në qeveri.
“Ne nuk jemi në qeveri, kjo është përgjegjësi e qeverisë të zbatojë rendin e ligjin si e përcakton kushtetuta dhe legjislacioni ne fuqi”, tha ai.
Këto deklarime, deputeti i LDK-së i bëri gjatë një konferencë për media të thirrur për të gjeturat në sektorin e shëndetësisë. Në këtë sektor ai tha se Qeveria ka dështuar plotësisht.
“Një ministër e largoi në mes të pandemisë që të fitojë pushtet, ministri i parë i dështuar i cili u largua nga kjo pozitë që të kandidojë për kryetar të komunës së Prishtinës, në kohën kur ka pasur shifra alarmante edhe të infeksionit edhe të vdekjeve me Covid-19. Pastaj, Kurti caktoi një ministër që duket se nuk kishte njohuri bazike të realitetit në Republikën e Kosovës. Si i tillë shumicën e kohës së mandatit të tij e kaloi në konferenca të ndryshme sikur të mos ishte fare ministër i Shëndetësisë”, tha Zemaj.
Sipas ish-ministrit të Shëndetësisë, dorëheqja e ministrit të fundit dhe caktimi i një ekipi ekzekutiv për menaxhim të shëndetësisë tregon se kryeministri dhe kjo qeveri e ka pranuar dështimin në këtë sektor.
“Se qeveria Kurti ka dështuar në menaxhimin e shëndetësisë flasin edhe shifrat e investimeve kapitale në këtë fushë. Vetëm 5 për qind investime kapitale në shëndetësi janë realizuar gjatë këtij viti”, tha ai.
Në këtë konferencë deputeti i LDK-së tha se vetëm 530 mijë euro nga 10 milion të zotuara janë shpenzuar për projekte nga Ministria e Shëndetësisë.
“Në këtë ministri nga 15 projekte kapitale që janë paraparë me ligjin e buxhetit kanë filluar vetëm 2 dhe ato janë në fazën fillestare”, tha tutje Zemaj.
Sipas tij, përgjatë këtij mandati qeverisës të Vetëvendosjes nuk ka pasur asnjë lëvizje drejtë krijimit të Fondit për Sigurime Shëndetësore, njëjtë edhe me Sistemin Informativ Shëndetësor.
Ai ka përmendur largimin e mjekësve nga Kosova si dhe nga institucionet shtetërore për ato private.
“Vetëm për 9 muaj të vitit 2022 janë larguar 180 mjek që i bie mesatarisht 20 mjek në muaj, është rritur edhe numri i mjekëve që kanë lëshuar sektorin publik për të kaluar tek ai privat për të njëjta arsye. Tek mjekimi intensiv 22 anesteziolog e kanë lënë punën ndërsa vetëm në shtator të këtij viti e kanë lëshuar 5 nga ta”.
Zemaj e quajti alarm në vete mungesën, sipas tij të barnave esenciale si dhe listën e gjatë të pritjeve për pacientët në nevojë.
