Pas vendimit të Agjencisë së Ushqimit dhe Veterinarisë për mbylljen e tregut të kafshëve në Muhoc të Ferizajt, tregtarët dhe qytetarët kanë mbetur pa një treg të ri.
Komunarët po thonë se janë në pritje të një vendimi nga OSHP-ja, për caktimin e vendit se ku do të bëhet tregu i ri i kafshëve.
Brahim Osmani nga Lëvizja Vetëvendosje, ka thënë se Raporti i auditorit e ka gjetur shkelje në këtë projekt.
“Raporti i auditorit e ka gjetur shkelje në këtë projekt për shkak se komuna kishte lidhur kontratë me vlerë prej 218,272, eurove në formulimin e specifikave teknike ishin bërë përshkrime jo të sakta dhe jo të matshme të pozicioneve që është forma më e shpeshtë për keqpërdorime dhe kurdisje të tenderëve”, ka thënë Osmani.
”Ne e kemi një Organ Shqyrtues të Prokurimit dhe me që kemi kompani që ankohen ndaj njëra tjetrës na mbetet vetëm të presim dhe në momentin kur të kthehet përgjigja nga OSHP-ja dhe që zyra e prokurimit që e ka obligim ligjor ta nënshkruajë kontratën dhe ti zhvillojmë të gjitha procedurat të implementimit të LOT 2 të rregullimit të tregut të kafshëve”, ka thënë Burim Bajrami – Drejtor i Bujqësisë në Ferizaj.
Sipas një njoftimi nga Agjencia e Ushqimit dhe Veterinës, tregtimi i kafshëve në Komunën e Ferizajt do të lejohet atëherë kur Komuna përfundon investimet në lokacionin e përcaktuar dhe hapësira me objektet përcjellës të merr licencën.
