Themelimin e ekipit serb për lobimin kundër anëtarësimit të Kosovës në Këshillin e Evropës, njohësi i zhvillimeve politike në Beograd, Zoran Vulletiq e sheh si lëvizje e panevojshme. Procesi i anëtarësimit të Kosovë në institucionet ndërkombëtare, sipas tij, është i pashmangshëm.
“Mendoj se lobimi për të penguar Kosovën të hyjë në Këshillin e Evropës është shkelje e Marrëveshjes së Brukselit si dhe e Udhërrëfyesit të Ohrit, sepse një nga pikat thotë qartë, se Serbia dhe Kosova nuk do të pengojnë njëra-tjetrën në rrugën drejt BE-së. Kjo është e qartë”, deklaroi Zoran Vulletiq nga Forumi Demokratik Qytetar në Beograd.
Në seancën e jashtëzakonshme të Qeverisë, presidenti Aleksandar Vuçiq kërkoi nga të gjitha autoritetet shtetërore që të gjithë energjinë e tyre ta drejtojnë në procesin e lobimit kundër anëtarësimit të Kosovës në Këshillin e Evropës, edhe pse pranoi se shanset e Beogradit janë pothuajse zero.
Mirëpo, edhe pse Serbia po investon ne lobimin kundër, mendohet se anëtarësimi i Kosovës në Këshillin e Evropës është i pashmangshëm.
“Edhe Vuçiqi edhe Daçiqi mund të zemërohen me Dora Bakojanis kjo do të ndodhë. Nëse do të kishte mençuri politike, mbi të gjitha humanizëm ndaj komunitetit serb, ata nuk do ta mbanin peng për dekada, por pas Marrëveshjes së Brukselit ne 2013 ata do të ishin sponsorët e Kosovës në rrugën drejt Këshillit të Evropës, BE-së dhe OKB-së. Nëse do të kishim një mënyrë të tillë të drejtimit të politikës, sot do të jetonim në një atmosferë krejt tjetër”, deklaroi Vuletiq.
Shpallja e një fushate të madhe lobuese kundër Kosovës vlerësohet si një hap për të qetësuar opinionin publik, veçanërisht votuesit dhe partitë e djathta, prandaj si fushate për përdorim politik të brendshëm.
Kujtojmë se në ekipin kundër anëtarësimit të Kosovës është vënë ministri i Jashtëm në qeverinë teknike të Serbisë, Ivica Daçiq. Në këtë ekip do të jetë edhe Petar Petkoviq, aktualisht është kryenegociator i Serbisë në dialog më Kosovën, si dhe anëtarë të tjerë nga qeveria serbe, por edhe nga institucionet tjera shtetërore që do të angazhohen në lobimin kundër anëtarësimit të Kosovës në KiE.
