34 organizata të shoqërisë civile në një letër publike drejtuar rektorit të Universitetit të Prishtinës, Qerim Qerimi, kanë kërkuar suspendim të menjëhershëm të profesorit Xhevat Krasniqi, i dyshuar për ngacmime seksuale.
“Duhet të ketë zero tolerancë për rastet kur profesorët ngacmojnë seksualisht studentët e tyre dhe aq më pak kur këta profesorë veçse janë ngacmues seksual të dëshmuar, siç është Xhevat Krasniqi, i suspenduar nga Universiteti i Gjakovës për vepra të njëjta kriminale”, thuhet në letër.
Sipas qëndrimit të këtyre organizatave, heshtja nënkupton bashkëpunim dhe amnesti ndaj ngacmimeve seksuale brenda UP-së.
“Ju bëjmë thirrje që si bartës i pozitës më të lartë brenda këtij institucioni të merrni përsipër zgjidhjen e këtij rasti dhe vendosjen e drejtësisë në UP në duart tuaja. Çdo gjë më pak do të ishte një tradhti ndaj besimit që ju është dhënë për ushtrimin e kësaj detyre dhe një dështim për të mbajtur lart vlerat e integritetit dhe respektit brenda universitetit publik”, kërkojnë OJQ-të.
Ndaj profesorit Xhevat Krasniqi është bërë denoncim nga 27 studente të Fakultetit të Mjekësisë në UP. Pjesë e letrës publike ndaj rektorit janë disa nga organizatat më në zë në vend si YIHR, KCSF, QIKA, ORCA, RrGK, AGK, KRCT dhe të tjerë.
