Shefi i grupit parlamentar të Aleancës për Ardhmërinë e Kosovës, Besnik Tahiri, pas dështimit të seancës ku do të trajtohej shqyrtimi i projekt-rezolutës për tri vjet qeverisje, ka deklaruar se nuk i pranojnë kushtet për dorëzim nga ana e kryeministrit Kurti.
“Kryeministri Kurti duke u dorëzuar ka krijuar një pozicion për të negociuar kushtet e dorëzimit me opozitën, mirëpo ne këto kushte nuk i pranojmë por ne do të presim, herët a vonë, kapitullimin përmes dorëheqjes”, ka thënë ai.
Ai ka pasur kritika për qeverinë, duke thënë se nuk kanë se si t’u dalin përpara qytetarëve, pensionistëve, zyrtarëve shtetëror e diasporës.
Në ndërkohë ai është pyetur nga gazetarët nëse kanë munguar deputetët e AAK-së në seancën e thirrur nga kjo parti.
“Unë e nisi debatin, sot ka qenë një ngjarje e rëndësishme për heroin Shkëlzen Haradinaj në Gllogjan. Kanë munguar dy deputetë, Ramush Haradinaj e Time Kadrijaj. Unë e kam pasur fjalën si iniciues dhe në emër të grupit parlamentar fjalën e ka pasur Bekë Berisha. Të tjerët kanë qenë aty, kanë pasur fjalë të përgatitura për t’i thënë”, ka deklaruar Tahiri i AAK-së.
