Ministri i Brendshëm i Shqipërisë, Taulant Balla, tha të shtunën se reagimi në kohë i forcave të rendit, rrit besimin e publikut tek Policia e Shtetit.
Ai ka ndarë në Facebook pamje të operacioneve policore kundër paligjshmërisë gjatë 24-orëve të fundit.
Balla ka theksuar rëndësinë e reagimit në kohë të forcave të rendit dhe sigurisë, i cili ndikon edhe tek parandalimi i ngjarjeve kriminale.
“Rritja e besimit të qytetarëve tek Policia e Shtetit lidhet ngushtësisht me reagimin në kohë mbi ankesat apo thirrjet për ndihmë të qytetarëve, parandalimin e përshkallëzimit të konflikteve me armë zjarri, goditjen e armëmbajtjes pa leje dhe të kultivimit apo shpërndarjes së lëndëve narkotike”, tha Balla.
Ministri i Brendshëm gjithashtu ka përgëzuar Policinë e Shtetit për rezultatet e arritura në luftën ndaj paligjshmërisë.
“Gjatë 24 orëve të fundit janë sekuestruar shtatë armë zjarri, sasi të shumta fara, fidanë e bimë kanabis dhe janë arrestuar/proceduar 26 persona. Përgëzime Policisë së Shtetit në Vaun e Dejës, Dibër, Bulqizë, Lezhë, Mirditë, Tiranë, Durrës, Vlorë, Elbasan, Fier, Gjirokastër, Kukës, Korçë, Shkodër dhe Berat”, ka shkruar tutje në postimin e tij Balla. /Kosovatimes/
