Nga malet e Berishës, prej 4 janarit deri më 21 qershor të vitit 1999, çdo ditë jehonte zëri “Ju Flet Kosova e Lirë”.
Sot u festua 25-vjetori i ekzistencës së saj, në ditën kur Radio Kosova e Lirë e përmbylli misionin e saj të luftës në shtëpinë muze në Berishë. Për këtë foli Arbana, e bija e njërit prej themeluesve dhe drejtorit Ahmet Qeriqi.
“Përvjetorët na reflektojnë momentet e ndodhitë e caktuara që kanë ndodhur e kanë lënë gjurmë të pashlyeshme në ngjarjet e caktuara të së kaluarës individuale dhe kolektive, me qëllim të përkujtojmë ku kemi qenë, ku jemi dhe ku synojmë të arrijmë”, ka thënë Qeriqi.
“Kur jemi në këso ngjarje nuk mund të mos e kujtojmë drejtorin Ahmet Qeriqi i cili ka drejtuar, ka organizuar dhe ka përpiluar lajme ka qenë i angazhuar dhe ka qenë përgjegjësi kryesor i radios Kosova e Lirës mund të mos e kujtojmë edhe Kosovapresin”, ka thënë Sadik Halitjaha, ish komandant
Po sot, bunkeri në Pallanik që atëkohë u shfrytëzua për transmetim në momentet më të rrezikshme, mori pamje tjetër.
“Radio Kosova e Lirë është aset shtetëror, këtë e ka themelua shtabi i përgjithshëm i UÇK-së. Nga sot e tutje do të jetë nën mbrojtjen e Agjensionit Shtetëror për mbrojtjen e monumenteve kulturore”, ka thënë Nysret Pllana.
Në ceremoninë e përurimit të obeliskut te bunkeri i Radios Kosova e Lirë, u ndanë mirënjohje për të gjitha ata që kontribuuan për idenë dhe ndërtimin e këtij obelisku.
