Kryeministri polak Donald Tusk shpreh habinë e tij në një postim në rrjetin social X pas informacionit se kryeministri hungarez Viktor Orban mund të vizitojë Moskën vetëm pak ditë pas udhëtimit të tij në Kiev.
Thashethemet për vizitën tuaj në Moskë nuk mund të jenë të vërteta, Viktor, apo mund të jenë? ka shkruar Tusk, duke etiketuar profilin zyrtar të kryeministrit hungarez në postim. Informacionin për udhëtimin e Orbanit në Rusi e ka publikuar gazetari hungarez Szabolcs Panyi, të cilin e kanë konfirmuar edhe burime të Radios Evropa e Lirë.
Orban u propozoi ukrainasve një armëpushim
Qeveria hungareze nuk ka folur ende për të konfirmuar apo mohuar vizitën. Një zyrtar i Bashkimit Evropian i cili dëshironte të mbetej anonim tha për Radion Evropa e Lirë se Orban nuk e kishte informuar Brukselin për largimin e tij në Moskë.
“Nëse Orban do ta kishte pyetur, Charles Michel do ta këshillonte me forcë kundër një vizite të tillë”, është i bindur zyrtari. Të martën, Orban ishte në Kiev, ku sugjeroi që ukrainasit të bien dakord për një armëpushim. Presidenti Volodymyr Zelensky e hodhi poshtë idenë e përmendur.
Të hënën, Hungaria mori presidencën e saj gjashtëmujore të Këshillit të Bashkimit Evropian.
