Një makinë POLICE është përmbysur anash dhe një autobusi është djegur gjatë trazirave të djeshme në qytetin anglez të Leeds. Banorët janë këshilluar të qëndrojnë në shtëpi deri në qetësimin e situatës. Një video që tregon njerëzit duke hedhur objekte drejt një automjeti policie para se ta përmbysin është bërë virale në rrjetet sociale.
Sekretarja e Brendshme Yvette Cooper dënoi “skenat tronditëse”. Një pronar restoranti lokal tha se skenat kaotike u shkaktuan nga përpjekjet për të marrë fëmijët nga familjet e tyre, të cilave disa u përgjigjën duke vënë zjarr dhe “hedhur gurë”.
Policia njoftoi se dje në orën 17 janë thirrur në një adresë në rrugën Luxor dhe se kanë konstatuar një “rrëmujë të vazhdueshme” në të cilën janë përfshirë zyrtarë të agjencisë kompetente dhe fëmijë. Më shumë njerëz filluan të mbërrinin në vendngjarje dhe policët dhe fëmijët u dërguan në një vend të sigurt.
Autobusi u dogj për orë të tëra
Trazirat vazhduan deri në mbrëmje, me Guardian që raportoi se policia u tërhoq disa rrugë më larg, ndërsa një helikopter policie monitoroi skenën nga ajri. Policia premtoi një hetim të plotë për “të gjitha veprat penale, përfshirë edhe zjarrvënien e automjeteve”.
“Duam ta bëjmë shumë të qartë se ndaj përgjegjësve do të zbatohet pesha e plotë e ligjit”, u njoftua. Një autobusi u dogj në Foundry Approach, duke shkaktuar që të ngrihej tym i zi i dendur që mund të shihej nga pjesë të tjera të qytetit.
Autobusi u dogj për disa orë, përpara se banorët të fillonin të mblidhnin ujë nga shtëpitë aty pranë për të shuar zjarrin. “Më shumë oficerë janë vendosur në zonë për të ndihmuar në menaxhimin e këtij incidenti. Disa rrugë janë gjithashtu të mbyllura dhe njerëzit këshillohen të shmangin zonën në këtë moment,” tha policia mbrëmë.
Dëshmitari: Shoferi ka ikur pasi e ka kuptuar se ishte në rrezik
“Ata po hidhnin gjëra në automjetet e policisë. Në fakt çdo gjë që mund të merrnin nga dyshemeja. Gurë nga kopshti, plehra, shishe, çdo gjë. Duke parë nga dritarja, mund t’i shihje ata duke sulmuar makinat që ishin ndalur në semaforë. ”, tha Riesa, i cili punon në një farmaci aty pranë.
“Kishte një autobus në semafor, me sa duket është ndalur nga të gjithë ata njerëz. Po përpiqej të kalonte, por nuk mundi, kështu që thjesht shkoi mbrapa dhe ndaloi. Shoferi e la autobusin atje sepse e ndjeu se ai ishte në rrezik i pashë njerëzit se si i hidhnin gjërat në autobus para se shoferi të dilte jashtë”, shtoi ajo.
Një zëdhënës i First Bus në Leeds theksoi se dy nga automjetet e kompanisë u dëmtuan në trazirat, por asnjë nga shoferët apo pasagjerët nuk u plagos. “Një veturë na është djegur, por ajo ka qenë e zbrazët për shkak se udhëtarët paraprakisht ishin transferuar në një autobus tjetër bashkë me shoferin”, tha ai.
“Ne do të ndjekim këshillat e policisë për të marrë një vendim se kur do të rifillojnë rrugët normale dhe do të njoftojmë klientët sa më shpejt që të mundemi”, shtoi ai.
Një politikan vendas qetësoi rebelët
Dëshmitari Usmaan përshkroi se si më herët atë ditë ai pa policinë që tërhiqej për të qetësuar skenën. “Policia vendosi të tërhiqej, unë fola me rreshterin dhe ai tha se ata vendosën të tërhiqen për të de-përshkallëzuar situatën,” vuri në dukje ai.
“Më pas erdhi policia e trazirave dhe gjithçka u përshkallëzua. U hodhën tulla dhe më pas policia u tërhoq. Më pas i vunë flakën autobusit,” shtoi ai.
“Kjo është shumë. Unë kurrë nuk kam parë diçka të tillë,” tha një grua. Shoqja e saj shtoi: “Si në një film”. Adoleshenti i maskuar hodhi kova në zjarr dhe i tha Guardian se ishte 16 vjeç. Këshilltari lokal Mothin Ali mbërriti në vendngjarje për të qetësuar situatën.
Ai i mori një arkë druri një burri që tentoi ta hidhte në zjarrin e autobusit. “Mendo para se të bësh diçka. Ka fëmijë në këto shtëpi. Disa prej nesh e bënë këtë 10 vjet më parë dhe na u shkatërrua e gjithë jeta. Përdor trurin”, i tha ai.
Nuk ka informacione se dikush është lënduar nga trazirat. Disa shprehën zhgënjimin që policia nuk ishte e pranishme. Një burrë tha: “Policia nuk kujdeset për zonën tonë. Ata sapo janë larguar, do të na lënë ta trajtojmë vetë.”
