Vera rëndom i sjell në vendlindje bashkatdhetarët tanë, por po ashtu ata rëndom përballen me pritje të gjata në kufij. Kryesisht deri në 3 orë janë pritjet e tyre, por që ato shkurtohen ose rriten varësisht edhe nga oraret e hyrje-daljeve.
Bashkatdhetarët të cilët po vijnë në Kosovë për pushime, vazhdojnë të presin me orë të tëra në kufirin Kosovë-Serbi, te Dheu i Bardhë. Shumë nga udhëtarët po presin edhe në dalje nga ana e Kosovës.
“Deri në kufi është kolona e madhe deri në tri kilometra, ka udhëtarë me fëmijë, dhe rruga është e ngarkuar në anën e Kosovës”, tha Qamil Adili.
“Punën e kanë bërë perfekt, përveç se është ngarkesë shumë e madhe, për këtë arsye jemi vonuar pak, përndryshe gjithçka ka qenë në rregull”, u shpreh Fatos Dubova.
Pritjet e udhëtarëve për të kaluar kufirin ndërmjet Kosovës janë deri në 1 orë, ndërsa për të hyrë në Kosovë deri në tre orë.
Me gjithë pritjet, disa nga bashkatdhetarët thonë se kanë kaluar mirë gjatë rrugës, porse në kufi, në të dy pikat e kontrollit të këtij pikëkalimi, punohet vetëm në një sportel.
“Dy orë, në orën dhjetë kam qenë në kufirin andej, në Serbi tash dola në 12. Vetëm një sportel për kontrollë ishte, me pas qenë më shumë, as dhjetë minuta s’kishim pritë”, tha Gentian Jasharaj.
“Një orë e gjysmë kemi pritur sepse vetëm një sportel ishte duke punuar, gjithçka ka qenë në rregull”, deklaroi Esat Musliu.
Sipas Qendrës Kombëtare për Menaxhim Kufitar pritjet më të gjata janë nëpër pikëkalimet kufitare te Dheu i Bardhë që zgjasin deri në tri orë, ndërsa në Merdar deri në dy orë.
