Deputetja e Listës Guxo, Jeta Statovci, ka reaguar ashpër pas incidentit diplomatik në Aeroportin e Shkupit, ku ishte e përfshirë Presidentja e Kosovës, Vjosa Osmani. Statovci e ka cilësuar trajtimin ndaj Osmanit nga një zyrtar maqedonas si të papranueshëm dhe tendencioz, duke e quajtur atë një akt që pasqyron një mendësi të së kaluarës dhe që bie në kundërshtim të plotë me Konventën e Vjenës.
“Trajtimi jo dinjitoz ndaj Presidentes së Kosovës, Zonjës Vjosa Osmani, nga një zyrtar tendencioz maqedonas dhe me mendësi të së kaluarës, në kundërshtim total me Konventën e Vjenës, është i papranueshëm,” tha Statovci, duke shtuar se raportet mes Kosovës dhe Maqedonisë së Veriut gjithmonë kanë qenë konstruktive dhe në përputhje me standardet evropiane. Ajo theksoi se sjellje të tilla nuk përputhen me mendësinë demokratike dhe rregullat ndërkombëtare që rregullojnë marrëdhëniet midis shteteve të pavarura.
Në lidhje me incidentin, reagoi edhe Këshilltari për Media i Presidentes, Bekim Kupina, i cili sqaroi se zyrtari i sigurimit në aeroport kishte tentuar të konfiskojë telefonin personal të Presidentes Osmani dhe e kishte shtyrë fizikisht atë. Kupina theksoi se Presidentja nuk kishte lejuar një veprim të tillë, duke e konsideruar atë një shkelje të rëndë, dhe se Policia e Kosovës kishte ndërhyrë për të zgjidhur situatën.
“Kjo sjellje e zyrtarit maqedonas të aeroportit është në kundërshtim me çdo praktikë ndërkombëtare, sipas të cilave kur krerët e shtetit udhëtojnë, ata mbrohen me privilegje e imunitete diplomatike,” deklaroi Kupina. /Kosovatimes/
