Për tre muajt e fundit të këtij viti, janë ofruar rreth 3 mijë shërbime stomatologjike në QKMF-re “Dr. Nagip Rexhepi” të Gjilanit, duke përfshirë edhe QMF-re në Dardani, Arbëri dhe Besalc.
Shefi i Shërbimit të Stomatologjisë, në QKMF-re, Dr. Taulant Ramadani, saktëson se për tre muajt e fundit të jenë trajtuar mbi 2 mijë e 700 pacientë me patologji të ndryshme, në nevojë për shërbim shëndetësor.
Sipas tij, krahasuar me muajt paraprak të stinës së dimrit, ka pas rënie të rasteve, pasi që në sezonet verore, bie numri i vizitave shkaku i pushimeve dhe agjendave personale të qytetarëve.
Ndërsa, kur është fjala për gjinitë, thuhet se 1 mijë e 213 prej tyre të kenë qenë meshkuj, kurse 1 mijë e 487 femra.
“Për të njëjtën periudhë kohore janë trajtuar 500 dhëmbë dhe bllombuar dhe si dhe 380 ekstrakcione. Kurse raporti reflekton për një numër të konsiderueshëm trajtimesh e që kalon gjithmonë numrin e ekstrakcioneve. E, kjo nënkupton që evitimi i nxjerrjeve është sukses dhe rezultat i dhënies së prioritetit në trajtim dhe shërim”, ka theksuar Shefi i Stomatologjisë, Dr. Taulant Ramadani.
Ai tha se Shërbimi i Stomatologjisë në sektorit publik ka për qëllim parandalimin, diagnostikimin dhe trajtimin e patologjive të ndryshme, këtu duke përfshirë po ashtu urgjencat stomatologjike.
“Investimet e bëra, për të cilat jam prononcuar më herët, kanë sjellë dhe po vazhdojnë të sjellin rezultate te kënaqshme për pacientët dhe stafin e Stomatologjisë të cilët punojnë me shumë seriozitet dhe përkushtim në të mirë të qytetarëve tanë”, nënvizoi, Shefi Ramadani.
Sipas tij, fuqizimi i sektorit publik shëndetësorë nënkupton përfitim për qytetarët tanë në marrjen e shërbimeve shëndetësore.
Ndërkaq rishprehu kënaqësinë me investimet e realizuara, funksionalizimi i pikës së re që do të bëhet ditët në vijim dhe seriozitetin drejtë trajtimit të dinjitetshëm të Stomatologjisë së sektorit publik.
Shërbimi i Stomatologjisë nga sektori publik, që përfshirë QKMF-në “Dr. Nagip Rexhepi” në Gjilan, Dardaninë, Arbërinë dhe Bresalcin, aktualisht funksionon me 20-të Doktorë të Stomatologjisë. Në mesin e tyre specialistë të lëmive të ndryshme stomatologjike, infermierë dhe teknikët e Stomatologjisë. /GJILANI INFO/
