Prej sot programi i dy radiove të Transmetuesit Publik të Kosovës është më afër komuniteteve etnike që jetojnë në këtë pjesë të Kosovës.
Në pikën transmetuese të Cërnushës në komunën e Mitrovicës, sot është instaluar sistemi i antenave me transmetues të rinj për dy kanalet e Radio Kosovës.
Me këtë investim, është rritur për 50 fish fuqia shpërndarëse e sinjalit të Radio Kosovës, në frekuencat 87.6 dhe 91.5 MHz.
Drejtori i Radio Kosovës, Arsim Halili, ka theksuar se instalimi i paisjeve të reja teknike mundëson rritjen e cilësisë së transmetimit dhe mbulueshmërisë së rajonit të Mitrovicës dhe të veriut të vendit me sinjalin e dy kanaleve të Radio Kosovës, të cilat përveç programit në gjuhën shqipe ofrojnë program ditor për komunitetin serbë, boshnjakë, turke dhe romë që jetojnë në këtë pjesë të Kosovës.
“Jam i lumtur që e përuruam me sukses këtë korridor të ri dhe dritare të re të informimit, komunikimit dhe integrimit të komuniteteve që jetojnë në rajonin e Mitrovicës dhe të veriut të Kosovës pasi prej sot është 50 fishuar fuqia transmetuese e dy kanaleve të Radio Kosovës dhe qytetarët e kësaj ane kanë qasje më të lehtë përmes sinjalit tokësor në programet e dy kanaleve të radios së Trasmetuesit Publik”, ka deklaruar Halili.
Transmetuesit e rinj kanë kapacitet transmetimi shumëfish më të lartë sesa fuqia e deritashme e shpërndarjes së sinjalit e cila ka qenë shumë i ulët si pasojë e amortizimit të paisjeve teknike dhe mungesës së investimeve prej mbi 23 vjetësh.
“Nga sot programet e dy kanaleve të radio Kosovës do të dëgjohen me cilësi të lartë në këtë territor duke ditur që deri sot fuqia transmetuese nga kjo pikë ka qenë vetëm 20wat ndërsa tani është rritur në 1,000 wat gjë që siguron mbulueshmëri të plotë në këtë territor. Nesër planifikojmë që punime të njëjta t’i kryejmë në rajonin e Gjilanit ndërsa kah mesi i javës do të bëhet vendosja e transmetuesve të rinj në rajonin e Dukagjinit”, ka deklaruar udhëheqësi i teknikës dhe produksionit në Radio Kosovë, Blerim Byqmeti.
Në vazhdën e mundësimit të qasjes dhe përmbushjes me sukses të misionit në shërbim të Publikut, nesër do të vazhdojnë investimet në Majën e Gjelbër që mbulon rajonin e Gjilanit për të vazhduar me instalimin e transmetuesve të rinj në Rajonin e Dukagjinit.
Kujtojmë se në fillim të këtij viti janë instaluar transmetues të rinj prej 5KW për dy kanalet e Radio Kosovës në Golesh, prej ku është dhjetëfishuar fuqia transmetuese në pjesën qendrore të Kosovës dhe është instaluar sistem i ri i antenave në Zatriq ku është gjashtëfishuar fuqia transmetuese në rajonin e Dukagjinit.
