Plani Zhvillimor Komunal i Kryeqytetit 2024-2032, nuk dihet ende se kur do të jetë në rend dite në seancën e kuvendit komunal të Prishtinës për votim, në mënyrë që të kalojë në diskutim publik.
Ky plan, i cili po konsiderohet si shumë i rëndësishëm për Prishtinën, ishte në rend dite në një seancë të jashtëzakonshme muajin e kaluar, por kjo seancë u ndërpre, pasi dy partitë opozitare në Prishtinë, Vetëvendosje dhe PDK, lëshuan sallën, duke e kundërshtuar këtë plan.
Nga PDK thanë se ky dokument duket të jetë i paplotësuar, derisa treguan se çfarë duhet bërë me të, në mënyrë që t’i ketë edhe votat e tyre.
“Qytetarët të jenë pjesë e këtij procesi, të ftohen të gjitha grupet e interesit të cilat mund ta japin kontributin e tyre, si në kuptimin e hartimit të planit po ashtu edhe në dhënien e ideve. Ky plan do të jetë i qytetarëve, nuk është i Përparim Rames as i komunës, është plan i qytetit, është i qytetarëve i cili determinon të ardhmen 8 vjeçare në kuptimin e zhvillimit të kryeqytetit. Të gjithë këta hapa fatkeqësisht nuk janë ndjekur as nga kryetari Rama”, tha Granit Geci, asamblist i PDK-së në Prishtinë.
Këtë muaj, Kuvendi Komunal i Prishtinës, ka shkuar në pushim, andaj edhe nuk pritet që të trajtohet në kuvend komunal.
Nga komuna e Prishtinës, folën për rëndësinë e këtij plani, derisa thanë se po shpresojnë që në përpjekjen e radhës ta kalojnë në diskutim publik.
“Është dokumenti kryesor i planifikimit strategjik i Komunës së Prishtinës, por edhe si dokument profesional, hapësinor si më i rëndësishmi. Kryeqyteti nga viti 2022 është kushtimisht pa një Plan Zhvillimor Komunal sepse Plani Zhvillimor ka qenë e destinuar të jetë që nga viti 2012 deri ne vitin 2022 një afat 10 vjeçar dhe kjo ka shkaktuar shume telashe edhe për çështje të tjera, qoftë urbanistike, arkitekturore dhe qytetit në tërësi”, tha Donat Lushaku, zëdhënës i komunës së Prishtinës.
Vetëvendosje në Prishtinë, përveç që e pati kundërshtuar në seancë e pati mbajtur një konferencë para nisjes së saj, kishte reaguar edhe përmes një komunikate në të cilën e patën konsideruar këtë plan të paligjshëm dhe në dëm të interesit publik, derisa në reagimin e tyre patën thënë se , është e papranueshme dhe e dëmshme që zhvillimi i Prishtinës të përcaktohet nga një dokument që në vete përmban 28 komente negative, të gjetura nga Ministria e Mjedisit, Planifikimit Hapësinor dhe Infrastrukturës, si organ mbikëqyrës i shkallës së dytë.
Kryetari i Prishtinës, Përparim Rama, kishte thënë muajin e kaluar në një intervistë për RTK-në, para mbajtjes se seancës, se ky dokument i jep një drejtim zhvillimit të të gjithë komunës.
