Jeta si Drejtor në Kryeqytet ka sjellë një dinamikë të jashtëzakonshme për Krenar Xhaferin, i cili përballet me një sasi të madhe të komunikimeve dhe angazhimeve ditore. Brenda tri orëve e gjysmë të punës, drejtori ka marrë më shumë se 270 telefonata direkte, një fluks që e ka bërë të pamundur për të menaxhuar të gjitha thirrjet.
Dita e tij nis herët, në orën 7:00, dhe shpesh përfundon pas mesnatës, me një numër të madh të takimeve dhe daljeve në terren. Kjo dinamikë e re është shumë më intensive se ajo që ka përjetuar gjatë mandatit të tij si këshilltar i Ministrit në Qeveri.
“Dinamika në Komunë është krejtësisht ndryshe. Vetëm gjatë ditës së sotme, kam pasur mbi 270 telefonata direkte dhe nuk kam arritur t’u përgjigjem të gjithave. Kërkoj ndjesë për këtë, sepse jam mësuar të jem gjithmonë i qasshëm,” shprehet drejtori, i cili thekson se pavarësisht këtij shqetësimi, ai është i përkushtuar të vazhdojë rrugëtimin e tij me qartësi dhe integritet të plotë.
Ky intensitet i punës dhe përgjegjësitë e shumta që vijnë me rolin e ri, kanë sjellë një sfidë të re për Krenarin, por ai mbetet i përkushtuar për t’i shërbyer qytetit me ndershmëri dhe përkushtim maksimal. /Kosovatimes/
