Kryetari i Prizrenit, Shaqir Totaj, sot zhvilloi një takim me shtabin emergjent të krijuar për gjendjen aktuale me zjarre të hapura në Prevallë me ç’rast u njoftua se situata është nën kontroll, nuk janë duke u djegur drunjtë e lartë, prandaj, rrjedhimisht rreziku është më i vogël.
Bëhet e ditur se Totaj me vizitoi sot këtë zonë për ta parë nga afër gjendjen e krijuar.
“Meqenëse kemi të bëjmë me Park Nacional, nënkuptohet se edhe institucionet e nivelit kombëtar, por edhe ndërkombëtar si KFOR-i, kanë obligime dhe shtabi është në koordinim të plotë me të gjithë akterët e autorizuar që po merren me këtë çështje, derisa gjendja po monitorohet dhe nuk pritet eskalim”, njofton zyra për informim e Komunës së Prizrenit.
Sot, planifikohet intervenim dhe lokalizim i zjarrit për ta pasur nën kontroll dhe për t’i minimizuar pasojat eventuale.
Gjithashtu, bëhet e ditur se kryetari Totaj falënderoi të gjithë pjesëtaret e institucioneve lokale dhe qendrore për kontributin që po japin në menaxhimin e situatës së krijuar.
“Çfarëdo informacioni tjetër, nga kushdo që vjen, mund të jetë spekulim dhe si i tillë është pak i besueshëm. Do të ju mbajmë të informuar në vazhdimësi për zhvillimet që mund të ndodhin ndërkohë” , u shpreh Totaj.
