Kryeministri Albin Kurti u ka bërë thirrje institucioneve publike dhe bizneseve private që të zbatojnë rekomandimet e Ministrisë së Shëndetësisë (MSh) pas temperaturave të larta që po prekin vendin. Ai theksoi se këto masa janë thelbësore për mbrojtjen e shëndetit dhe sigurisë së punëtorëve gjatë kësaj periudhe të nxehtësisë ekstreme.
Kurti apeloi për ndryshimin e orareve të punës, duke shmangur aktivitetet gjatë orëve më të nxehta të ditës, nga ora 11:00 deri në 16:00.
Ai sugjeroi aplikimin e orareve fleksibël të punës, duke i lejuar punëtorët të fillojnë punën më herët ose të punojnë nga shtëpia kur është e mundur.
Për shtatzënat dhe personat me sëmundje kronike, ai rekomandoi që të lirohen nga puna gjatë orëve të pikut të nxehtësisë ose të punojnë nga shtëpia.
Kryeministri gjithashtu kërkoi ndalimin e punimeve në sektorin e ndërtimtarisë gjatë orarit të pikut të nxehtësisë, dhe shpërndarjen e informacioneve për mbrojtjen nga nxehtësia përmes burimeve të ndryshme.
Për më tepër, ai theksoi nevojën për kontrolle mjekësore për punëtorët që tregojnë shenja të stresit nga nxehtësia dhe sugjeroi që punët bujqësore të planifikohen në mëngjes herët ose pasdite vonë për të shmangur ekspozimin ndaj nxehtësisë ekstreme. /Kosovatimes/
