Në prag të Konventës Kombëtare Demokratike, Kryeministri i Republikës së Kosovës, Albin Kurti, zhvilloi një takim me kongresistin James P. McGovern. Ky ishte takimi i dytë mes tyre, pas atij në Washington dy vite më parë.
Kryeministri Kurti shprehu mirënjohjen për përkrahjen e vazhdueshme të Kongresit amerikan dhe kontributin e çmuar të Shteteve të Bashkuara të Amerikës për pavarësinë dhe shtetndërtimin e Kosovës.
Gjatë takimit, Kurti prezantoi progresin demokratik dhe ekonomik të Kosovës në tri vitet e fundit, duke theksuar përmirësimet në rangimet ndërkombëtare si dëshmi të avancimit të vendit.
Ai vuri në pah përkushtimin e Qeverisë për një zhvillim të barabartë ekonomik dhe për përfshirjen e të gjitha komuniteteve në jetën shoqërore dhe institucionale të vendit.
Kryeministri përmendi projekte të rëndësishme si rindërtimin e shtëpive për komunitetet joshumicë dhe pilotimin e edukimit të përbashkët mes komuniteteve.
Kryeministri Kurti falënderoi kongresistin McGovern për mbështetjen e tij dhe avokimin e vazhdueshëm për drejtësi për vëllezërit Bytyqi, të cilët u vranë nga forcat serbe në vitin 1999. /Kosovatimes/
