Tregu i Gjelbër në Prishtinë ishte i mbushur me pemë e perime. Ndonëse me një infrastrukturë jo të mirë, e me temperatura të larta, shumë qytetarë u panë teksa po furnizoheshin me pemë e perime, sidomos të stinës.
“Çmimet janë të volitshme, nuk janë të shtrenjta. Për standardin tonë janë në rregull..”, thotë një qytetar.
“Për pagat që i kemi, me një rrogë prej 100 euro çmimet janë të larta. Që sa vite kemi mbet kështu”, tha një qytetare.
Por tregtari Beqir Avdiu, i cili për 25 vite merret me shitjen e tyre, thotë se çmimet sivjet janë të arsyeshme, ani pse bujqit janë përballuar me sfida të ndryshme për shkak të temperaturave të larta.
“Është sezoni i gushtit dhe fillojmë me sezonin e turshive. Interesimi është mesatar sepse janë temperaturat e larta. Prodhimi sivjet për shkak të temperaturave të larta nuk ka dhënë rendimente sikurse vitet më përpara. Çmimet janë më lirë se vitin e kaluar. Vështirësi ka pasur të bujqit se ka qenë shumë nxehtë as uji nuk ka kryer punë. Sigurisht që kjo pastaj ndikon edhe në prodhim, shitje dhe në çmime”, thotë Beqir Avdiu, tregtar.
Ai shton se shumica e çmimeve të perimeve të stinës janë nga 1 euro për kilogram.
