Kryeministri i Shqipërisë Edi Rama ka deklaruar se Serbia dhe Kosova duhet të dalin nga konflikti ndërsa ka shtuar se Beogradi duhet mbajtur sa më shumë në anën e Perëndimit.
Teksa u pyet në forumin e sigurisë GLOBSEC 2024 që mbahet në Pragë, nëse ka pasur përpjekje nga Rusia për të minuar qeverinë shqiptare, Rama u shpreh se “Rusia nuk mund të gjej spiunë apo njerëz për t’i shërbyer për pak para”.
Kreu i qeverisë u shpreh se Rusia s’ka ndikim në Shqipëri, por në vende të tjera të rajonit, duke theksuar kështu rëndësinë për të mbajtur sa më afër Serbinë.
“Aty ku Rusia është më influente është në pjesë të tjera të Ballkanit. Kjo është arsyeja pse është e rëndësishme që Serbia dhe Kosova të dalin nga konflikti, na duhet ta mbajmë Serbinë në anën tonë sa më shumë të jetë e mundur. Sa më shumë ta lidhim integrimin evropian më atë të NATO-s, dhe sa më shumë NATO të jetë e pranishme ne Ballkanin Perëndimor, aq më mirë”, u shpreh Rama.
Rama u shpreh se Shqipëria nuk ka asnjë interes në drejtim të Rusisë dhe për këtë arsye pas viteve ‘90 s’ka pasur asnjë vizitë të rangut të lartë në Moskë apo anasjelltas.
“Për shkak të historisë sonë, ne kemi qenë Koreja e veriut e Evropës, Praga ka qenë po aq i paarritshme sa Parisi kur ishim në komunizëm. Kur rusët hoqën qafe Stalinin, ne vendosëm t’i rrinin besnik, ne e çojmë deri në fund. Kur SHBA dhe BE të mos jetë ne do jemi aty. Duke qenë vend stalinist deri në vitet ‘90 na bënte vendin më pak i interesat për Rusinë. Që nga 90’ e deri më sot s’ka pasur një vizitë në Moskë të rangut të lartë dhe anasjelltas. Askënd nuk e ka marrë malli. Ne s’duam asgjë të keqe për Rusinë, por sa i përket Rusisë nuk jemi të interesuar. Rusia nuk mund të gjejë spiunë apo njerëz për t’i shërbyer për pak para. Rusia, përzierja e saj në politikën tonë, kemi pasur disa gjëra, por asgjë të madhe”, deklaroi kryeministri Edi Rama.
