Qeveria gjermane ka bërë të ditur se kancelari Olaf Scholz, ka pasur një bisede telefonike me presidentin e Serbisë, Aleksandar Vuciq, tëcilit ia ka theksuar rëndësinë e dialogut midis Kosovës dhe Serbisë.
Përmes një njoftimi të lëshuar nga qeveria gjermane, thuhet se Scholz e ka ritheksuar mbështetjen e vazhdueshme të Gjermanisë për dialog.
Tutje thuhet se gjatë bisedës, Scholz dhe Vuçiq shkëmbyen mendime për statusin e marrëdhënieve dypalëshe dhe nënvizuan interesin e tyre të përbashkët për bashkëpunim konstruktiv dhe të orientuar drejt rezultateve.
“Kancelari foli edhe për rëndësinë e dialogut të ndërmjetësuar nga BE-ja ndërmjet Kosovës dhe Serbisë dhe ritheksoi mbështetjen e vazhdueshme të Gjermanisë për të”, thuhet në njoftimin e Qeverisë.
Në njoftim thuhet se Scholz dhe Vuçiq, kanë diskutuar edhe për rëndësinë e politikave të qëndrueshme për lëndën e parë.
“Ata diskutuan gjithashtu çështje të politikave të lëndëve të para. Kancelari Federal dhe Presidenti serb theksuan rëndësinë e një politike të qëndrueshme të lëndëve të para në Evropë dhe shkëmbimin e ngushtë për këtë çështje. Kancelari Federal ofroi mbështetje gjermane, duke përfshirë sigurimin e standardeve të larta mjedisore dhe të qëndrueshmërisë në minierat e litiumit në Serbi. Ai iu referua projekteve përkatëse gjermane për minierat e litiumit dhe sugjeroi ndarjen e ekspertizës ekzistuese për projektimin e qëndrueshëm dhe miqësor ndaj mjedisit të projekteve të tilla”, thekson njoftimi.
