Analisti i futbollit tonë, Arbnor Morina në emisionin ‘Dardanët` në RTK, ka thënë se ndryshimi i konceptit të lojës ka ndikuar në humbjen e Kosovës në duel me Rumaninë.
Kosova u mund nga Rumania (0-3), të premten mbrëma në ‘Fadil Vokrri’ në ndeshjen e parë të këtij sezoni në Ligën e Kombeve.
“Menjëherë është vështirë të thuhet pasi jemi në emocionet e ndeshjes. Lojtarët e rinj për të cilët është fol një kohë të gjatë dhe që Kosova ka pasur nevojë për ta. Duke parë ata në ekipet miqësore dhe kjo ndeshje, atëherë u vërejt ndryshimi nga 4-2-3-1 në 4-4-2”.
“Gjithsesi Rumania është përcjell dhe janë bërë analizat, por ky ndryshim i formacionit është bërë brenda një kohë shumë të shkurtër. Donim më qenë shumë më ofensiv dhe ekstrem përpara, por ata nuk patën topa të mjaftueshëm sepse mesfusha nuk ishte më imagjinatë. Rashica e Zhegrova shumicën e kohës kanë qenë shumë mbrapa. Zhegrova është i rrezikshëm në 20-25 metra por ka qenë prapa. Nuk duhet të dorëzohemi dhe duhet që këtë disfatë ta kthejmë në triumf në fundin e Ligës së Kombeve”, ka thënë Morina.
Dëshpëron Kosova, mposhtet thellë nga Rumania në “Fadil Vokrri”
Ndërkaq, Malsor Gjonbalaj, një tjetër analist i futbollit mendon se faji i kësaj humbje bie mbi përzgjedhësin Franco Foda.
“Ka qenë disa momente që kanë sjell një lojë të tillë, e para ishte ndryshimi në formacion. Qysh në start ishte e pakuptimtë, Rumania s’është skuadër pa cilësi që të krijosh një futboll të hapur. Shumicën e kohës ishim pa një mesfushor sepse shpesh ishin në pozitën e njëjtë”.
“Faji është i selektorit, futbollistët dhanë maksimumin por stema taktike nuk ishte krijuar për lojtarët. Në pjesën e madhe loja fitohet me grup, por këtu pamë që një pjesë më shumë vëmendja ishte në mënyrë individuale. Duhet harruar, është lojë për t’u kritikuar. Është zhgënjyese, një rezultat i tillë lë shumë pikëpyetje qysh në sfidën hapëse, janë rezultate që ndodhin. Për mua, ishte ndeshje që s’do koment dhe unë e shoh përgjegjës selektorin Foda”, ka theksuar Gjonbalaj.
Kosova ndeshjen e radhës e luan pas tri ditësh në udhëtim tek Qipro.
