Në Ditën Ndërkombëtare të Parandalimit të Vetëvrasjeve, organizata “Linja e Jetës” ka dorëzuar në Kuvendin e Kosovës mbi 13 mijë nënshkrime. Drejtori i “Linjës së Jetës”, Bind Skeja, ka kërkuar nga deputetët të miratojnë projektligjin për parandalimin e vetëvrasjeve.
Ai tha në “Info Plus” në RTK se ky projektligj është jashtëzakonisht i rëndësishëm sepse deri tani në Kosovë nuk ka asnjë politik që synon adresimin e çështjes së vetëvrasjeve në popull.
Sipas tij hartimi i projektligjit është i vonë sepse është dashur të kryhet vite më parë.
Skeja u shpreh optimist që ky projektligj do të trajtohet me seriozitet nga deputetët.
“Nëse ti e trajton problemin e vetëvrasjes dhe tenton të adresosh çështjet që çojnë në vetëvrasje, atëherë do t’i ndihmosh gjithë popullatës. Nëse ti bën skema të punësimit në mënyrë që t’i japësh pasuri qytetarëve dhe të reduktosh shifrat e vetëvrasjes, atëherë kjo do t’i ndihmojë çdo individi që është i papunë. Çkado që del nga ky ligj, dikë do ta mbështes, pati apo jo mendim për vetëvrasje”, tha Skeja.
