Prezantimin e kushtit 7 pikësh nga presidenti serb Vuçiq, në emër të normalizimit të raporteve me Kosovën dhe kthimin e serbëve në institucione, analistët politik po e shohin nga një kënd tjetër djallëzor të cilin e ka paramenduar Vuçiq, për realizimin e projektit të ndarjes së veriut të Kosovës si mjet i fundit para dështimit final. Kjo lojë sipas tyre është karta e fundit, mbase e shpenzuara akoma pa u publikuar, dhe nuk do të ketë sukses. Kështu vlerësojnë analistët politik Arsim Aziri dhe Blerim Burjani
“Pikat me të cilat është deklaruar presidenti Vuçiq në lidhje me rikthimin e kushteve me të cilat fuqizohet pozicioni i serbëve në Republikën e Kosovës, tregon edhe njëherë për apetitet e tija të sëmura dhe tendencën për ta paraqitë pushtetin aktuale si denigrues në raport me serbët. Ky është një manipulim i radhës në emër të secilës mendohet të rritet agresioni i Serbisë brenda Kosovës dhe kësisoj ta minimizoj fuqinë kushtetuese brenda shtetit tonë, veçanërisht në atë pjesë e cila është projekt për ndarje nga ana e Serbisë”, tha për “Kosova Times,” analisti Arsim Aziri.
Me mashtrime të tilla ndaj serbëve lokal të Kosovës, sipas Azirit, Vuçiqi po e humb ndikimin e tij dhe ata po integrohen gjithnjë e më shumë në jetën publike e politike të Kosovës, duke u çliruar nga bandit kriminale, prandaj edhe presidenti serb me këtë hap po mundohet që të ndalet në shkallën e fundit dhe ta provon edhe njëherë sa është duke qëndruar autoriteti I tij I rrënuar tek serbët e Kosovës, të cilët kanë filluar të ja kthejnë shpinën.
“Vuçiq aktualisht është në presion të madh, dhe përmes propagandës destruktive në kuptimin e kërkesave ndaj serbëve, po mundohet ta ngrisë autoritetin e tij politik që dorën në zemër tashmë e tre vite është në rënie. Rënien e autoritetit dhe ndikimit të tij tek serbët lokal të Kosovës, të cilët po i kthehen realitetit të ri shtetëror, e dëshmon më së miri atmosfera e krijuar stabile, pas pranimit të tabelave të veturave, ndërrimit, respektivisht konvertimit të dokumenteve personale nga ato ilegale të Serbisë në dokumentet legale të shtetit të Kosovës, e ku përfshihet edhe regjistrimi i veturave dhe të gjitha llojeve të automjeteve në RKS. Vuçiq duhet ta dijë tani se nuk mundë të ketë kthim në institucione të atyre që janë larguar duke u manipuluar me telekomandën e tij. Duhet të zbatohen ligjet dhe kushtetuta. Zgjedhjet lokale sipas ligjit dhe kushtetutës e kanë afatin e caktuar dhe nuk mundë të ketë rikthim ndryshe për zyrtarët lokal dhe ata komunal. Për policët që janë larguar është institucioni i konkursit. Të gjithë janë të barabartë të konkurrojnë dhe të bëhet verifikimi se kush i plotëson kushtet fizike dhe ato profesionale, por edhe pastërtinë e figurës për të qenë polic i Kosovës. Pra gjithçka sipas ligjeve të shtetit tonë dhe jo urdhrave ultimative të Serbisë”, tha Aziri për Kosova Times”.
Edhe për analistin politik Blerim Burjani, duke pasur në dijeni praktikën e lojës shantazhuese të Serbisë ndër vite, paraqitja e kushteve të fundit nuk është befasi por edhe një taktikë tjetër destruktive që nuk do të kalon.
“Shtatë pikshi është jo i befasueshëm për askënd ,Vuçic u dorëzua. Nuk mundet ndryshe me shty agjendën për pakicën serbe. Ai tash po kërkon kthimin në institucionet kosovare. E tërë problematika e krijuar ishte skenar për ndarje të asaj pjese të Kosovës, por dështimi me Banjskon, dhe largimin e serbëve kosovar nga institucionet, i ka kushtuar shtrenjtë politikisht politikës destruktive të Aleksandër Vuçiqit. Tash kthimi në institucione është ide e përbashkët edhe e BE-së. Pra kjo është bërë me marrëveshje me BE-në dhe SHBA-të që të krijohet hapësirë e njëjtë për kthim në institucione. Kjo qasje e Vuçiqit nuk është asgjë e re. Politika e tij ciklike prej krize në krizë është e njohur. Pra Vuçiq asnjëherë nuk do zgjidhje për normalizim por për të gjetur rrugë politike të tjera që atë akoma e mbajnë dhe e kthejnë në Kosovë”, tha Burjani për “Kosova Times”.
