Çështja e furnizimit me ushqim për pjesëtarët e Forcës së Sigurisë së Kosovës vazhdon të mbetet njëra prej temave më të rëndësishme ditëve të fundit.
Madje, gjatë paradites së sotme është konfirmuar lajmi se ministri i Mbrojtjes, Ejup Maqedonci, nuk e ka nënshkruar tenderin për ushqim, të cilin u raportua se zëvendësi i tij, Shemsi Syla, e kishte klasifikuar si konfidencial.
Nga Ministria e Mbrojtjes e kanë mohuar lajmin se Maqedonci i ka dërguar letër Kurtit për këtë çështje, veçse e kanë konfirmuar lajmin se tenderi është anuluar.
“Realisht me datën 11 tetor këtë të premte nga ana e ministrit është dërguar udhëzimi tek administrata që të anulohet tender mirëpo për arsye të cilat nuk janë qëndrime personale të ministrit, por të dalura si rezultat që qëndron në mes operatorëve ekonomik të shpallur fitues në tenderin e shërbimeve për ushqim, njëri prej të cilëve madje edhe vet ka kërkuar që të anulohet tenderi”, ka thënë Liridona Gashi, zëdhënëse në Ministrinë e Mbrojtjes
Gashi thotë se kontrata nuk është nënshkruar nga ministri, e që sipas saj, kjo nuk mund të prodhojë pasoja juridike e financiare.
“Rrjedhimisht edhe duke pasur një situatë të tillë dhe një kontest të tillë që krijon edhe pasiguri ligjore të kontratës, ministri nuk e ka nënshkruar kontratën. Mirëpo duke pasur një tender që procedurat e tenderit kanë përfunduar dhe është shpallur një fitues, por kontratë nuk është nënshkruar, rrjedhimisht mund të themi që nuk kemi asnjë pasoj juridike as financiare në mes”, ka shtuar Gashi.
Ndërkaq, ministria ka bërë me dije se shërbimi me ushqim në të gjitha kazermat e FSK-së po vazhdon përmes angazhimit të Shërbimit Korrektues të Kosovës dhe Qendrës së Studentëve.
Megjithatë, Gashi thotë se javën e kaluar është hapur konkursi për pranimin e stafit profesional për ushqimin në FSK, në mënyrë që Forca të ketë kapacitete vetanake për furnizim me ushqim.
” Jemi në proces të pranimit të personelit të ri të stafit prej 106 personash, kuzhinierëve profesional, kontrata veç se është hapur me datën 10 tetor dhe pritet në afat prej 45 ditësh të përfundojnë gjitha procedurat për pranimin e tyre”, ka thënë ajo.
Nga ana tjetër, zëdhënësja e Ministrisë së Mbrojtjes ka konfirmuar se ministri Ejup Maqedonci sot është takuar me Komandanten Supreme të FSK-së, pas kërkesës së presidentes Osmani, për një raport të detajuar për gjendjen e krijuar në ushtri. Gashi ka thënë se çështje të diskutimit kanë qenë zhvillimet në FSK, duke përfshirë edhe çështjen e shërbimit me ushqim, me ç’rast e ka njoftuar presidenten me procesin e rekrutimit të kuzhinierëve profesionalë dhe stafit mbështetës.
