Presidenti i Serbisë, Aleksandar Vuçiq, është takuar sot me Komisionerin Evropian për Fqinjësi dhe Zgjerim, Oliver Varhelyi, dhe duke u nisur nga nervozizmi i Vuçiqit në konferencën për media, duket se takimi nuk ka kaluar në atmosferën më të mirë.
Qysh në fillim të konferencës për media Vuçiq ka falënderuar komisionerin evropian për ndihmën financiare për Serbinë prej 165 milionë eurosh, por në fjalinë e radhës indirekt ka thënë se është i zhgënjyer. Ai tha se çdo muaj Serbia paguan 200 milionë euro për gaz, dhe më shumë se 40 milionë euro për import të energjisë elektrike, kështu që ndihma evropiane për Serbinë është shumë e vogël.
Një tjetër gjë që e ka mërzitur dukshëm Vuçiqin është samiti i ardhshëm i liderëve ballkanikë në Tiranë në kuadër të “Procesit të Berlinit”. Vuçiq tha me tone të ngritura se kishte marrë vendim që askush nga Serbia nuk do të merrte pjesë në samitin e Tiranës, por megjithatë i premtoi komisionerit Varhelyi se do ta mendojë sërish. Siç dihet, Vuçiq kundërshton procesin e Berlinit, duke u përpjekur të instalojë në vend të tij unionin politiko-ekonomike “Balkani i hapur”, me Serbinë si udhëheqëse.
Në konferencën për media, gazetarët e pyetën Vuçiqin nëse ai mendon se transmetimi i tij ishte joproporcional dhe i ekzagjeruar, për të cilin presidenti i Serbisë u përgjigj se ai është patriot dhe se detyra e tij është të luftojë për Serbinë dhe popullin serb.
