Në godinën qeveritare, kryeministri Albin Kurti ka qenë nikoqir i takimit me Drejtorin Politik të Ministrisë së Punëve të Jashtme të Gjermanisë, Günter Sautter i cili u shoqërua nga diplomati gjerman në Kosovë, Jörn Rohde.
Në këtë takim në zyrën kryeministrore, kreu qeveritar i ka shprehur mirënjohjen mysafirit të lartë nga Gjermania për ndihmën dhe mbështetjen diplomatike, ushtarake dhe ekonomike të shtetit gjerman duke e cilësuar si ndihmë thelbësore për çlirimin, pavarësimin dhe ndërtimin e zhvillimin e Kosovës.
“U bisedua për rezultatet e Procesit të Berlinit, përfshirë gjashtë takimet ministeriale, dhe vlerësuam si arritje të rëndësishme marrëveshjen e re për Qasjen në Arsimin e Lartë dhe Deklaratën për Planin e Veprimit të Tregut të Përbashkët Rajonal (CRM) 2025–2028”, thuhet në njoftimit e dërguar medieve nga Zyra për Media e Qeverisë së Kosovës.
Gjithashtu, bëhet e ditur se gjatë këtij takimi diskutim u bë edhe për forcimin dhe thellimin e marrëdhënieve bilaterale ndërmjet Kosovës dhe Gjermanisë, si dhe për bashkëpunimin rajonal, dialogun në Bruksel dhe integrimet euro-atlantike.
Kryeministri i ka ofruar bashkëpunim të plotë në avancimin e agjendës së përbashkët në mbrojtjen dhe avancimin e demokracisë dhe lirive themelore, drejtorit politik Sautter, që mori këtë pozitë të re në Ministrinë e Punëve të Jashtme të Gjermanisë. /Kosovatimes/
