Në një konferencë për shtyp në Moskë, presidenti rus Vladimir Putin akuzoi Ukrainën se nuk dëshiron të negociojë për t’i dhënë fund konfliktit, duke shtuar se Rusia është gati për ta. Putin tha se presidenti ukrainas Volodymyr Zelensky vazhdimisht bën kërkesa, por nuk ofron propozime, madje ai nënshkroi një ndalim për negociatat me Rusinë.
Ai shtoi se Rusia, përkundrazi, është e gatshme për negociata paqësore dhe se ky ka qenë qëndrimi i saj që nga fillimi i luftës. Në përgjigje të pyetjes, presidenti rus tha se ishte i hapur ndaj mundësisë që Arabia Saudite të presë negociata të tilla, por theksoi se përmbajtja e tyre ishte e rëndësishme.
Takimi i BRICS do të mbahet javën e ardhshme
Ai theksoi se Rusia është e gatshme për negociata të reja, por bazuar në marrëveshjet e arritura tashmë me përfaqësuesit ukrainas në Stamboll në fillim të konfliktit. Këto marrëveshje parashikojnë, ndër të tjera, se Ukraina do të heqë dorë nga aspiratat e saj për anëtarësim në aleancën e NATO-s.
Putin kritikoi gjithashtu NATO-n, duke thënë se aleanca po luftonte Rusinë me “duart ukrainase”. “Fitorja do të jetë e jona,” tha presidenti rus, por nuk ofroi një kornizë kohore për përfundimin e luftës, duke thënë se ishte një çështje e NATO-s.
Putin ka thënë vazhdimisht se lufta do të vazhdojë për aq kohë sa anëtarët e NATO-s furnizojnë Ukrainën me armë, edhe pse ai vetë urdhëroi pushtimin e vendit fqinj. Lufta në Ukrainë është një nga temat e takimit të samitit të vendeve anëtare të bllokut ekonomik BRICS në qytetin rus të Kazanit, i cili do të zhvillohet nga e marta deri të enjten javën e ardhshme.
