Popullsia e Ukrainës ka rënë me 10 milionë njerëz, ose rreth një e katërta, që kur ushtria ruse filloi pushtimin e saj në shkallë të plotë të vendit në shkurt 2022. Këtë e bëri të ditur OKB-ja të martën, më 22 tetor, duke përmendur daljen e refugjatëve, rënien e natalitetit dhe humbjen e jetëve si pasojë e luftimeve.
“Ndikimi i menjëhershëm u ndje në rajonet që pothuajse u shpopulluan nga lufta, në fshatrat ku mbetën vetëm të moshuarit”, tha Florence Bauer, kreu i Fondit të Popullsisë së OKB-së për Evropën Lindore, në një konferencë për shtyp në Gjenevë. Ajo vuri në dukje se një numërim më i saktë dhe një regjistrim i plotë i popullsisë është i mundur vetëm pas përfundimit të luftës.
Popullsia e Ukrainës mund të bjerë në 25 milionë deri në vitin 2051
Ukraina, e cila kishte një popullsi prej më shumë se 50 milionë në kohën e rënies së BRSS në 1991, ka përjetuar, si pothuajse të gjithë fqinjët e saj të Evropës Lindore dhe Azisë Qendrore, një përkeqësim serioz të situatës demografike. Në vitin 2021, viti i fundit para pushtimit ushtarak rus, rreth 40 milionë njerëz jetonin në Ukrainë, vëren Reuters .
