Edhe në Deçan ka përfunduar grumbullimi i gështenjave. Banorët e kësaj ane thonë se edhe në të kaluarën kanë grumbulluar dhe shitur gështenja, brez pas brezi, dhe se me këtë frutë kanë siguruar të ardhura.
Për banorët e Rrafshit të Dukagjinit në të kaluarën gështenja ka qenë ndër burimet kryesore për ekzistencë. Kështu thonë fermerët e kësaj ane në ‘Ditën e Gështenjës’, në Deçan, ku krahas këtij produkti ata kanë ekspozuar edhe prodhime tjera vendore.
“Brez pas brezi, gjeneratë pas gjenerate, kemi mbledhur gështenja, pra kemi jetuar me to. Si fëmijë e mbaj mend mblidhnim gështenja dhe blinim gjëra për veshmbathje për shkollim e për të gjitha”, tha Faton Tolaj, fermer.
“Kjo ditë është e shumë e veçantë për rajonin e Dukagjinit është dita e gështenjës dhe në përgjithësi për të gjitha produktet tona është e veçantë dhe shumë mirë e organizuar”, tha Besim Zeka, prodhues.
Organizimi tashmë tradicional i Ditës së Gështenjës nga komuna e Deçanit dhe Ministria e Bujqësisë përmes panairit të prodhimeve vendore është në funksion të promovimit dhe nxitjes së fermerëve për shtimin e kapaciteteve të tyre prodhuese, thanë zyrtarët komunal dhe ekspertët e kësaj fushe.
“Sot për ne është një festë e dyfishtë sepse festojmë edhe ditën e gështenjës, një ditë e shënuar për ne, njëkohësisht rrethuar me shumë produkte të Deçanit dhe shumë fermerëve të mrekullueshëm që ka treva jonë”, tha Rifat Stojkaj, drejtor i DBZHR-së.
“Po kësaj gështenja ka filluar të subvencionohet edhe nga Ministria e Buqësisë, të mbjellën plantacione me kulturën e gështenjës e cila do të përshtatet në këto zona dhe do të jetë një aset i mirë për zhvillimin e gjithëmbarshëm dhe zhvillimin e familjeve që janë në rrethinën e kësaj gështenje”, tha Bajram Çeku, agronom.
Në masivin e pyjeve në pjesën perëndimore të Rrafshit të Dukagjinit janë rreth 3500 hektarë me gështenjë.
