ISH-Presidenti i SHBA-së, Donald Trump, ka thënë se i vjen keq që la Shtëpinë e Bardhë pas humbjes së zgjedhjeve presidenciale të vitit 2020, diçka që nuk e ka pranuar kurrë.
“Ne patëm kufirin më të sigurt në historinë e vendit tonë ditën që u largova. Nuk duhej të largohesha. Dua të them, sinqerisht, sepse kemi bërë shumë mirë,” tha kandidati republikan për president në një tubim të fushatës në Lititz, Pensilvani.
“Ne kishim ekonominë më të mirë, kishim gjithçka”
Trump shtoi se tani ka “qindra avokatë” në çdo vendvotim për zgjedhjet e ardhshme presidenciale.
Ai foli për të arriturat e presidencës së tij. “Ne kishim ekonominë më të mirë ndonjëherë. Ne kishim atë mur. Kishim gjithçka.”
Trump humbi zgjedhjet presidenciale të vitit 2020 ndaj kundërshtarit të tij demokrat, Joe Biden.
Edhe sot ai refuzon të pranojë humbjen. Ish-presidenti ngriti dhjetëra padi pasi Biden fitoi në vitin 2020, të cilat dështuan në gjykatë.
Ai u largua nga Shtëpia e Bardhë disa orë para inaugurimit
Këmbëngulja e tij se ai kishte fituar dhe se “fitorja” i ishte vjedhur, bëri që mbështetësit e tij të sulmonin Kapitolin në Uashington, selia e Kongresit të SHBA, më 6 janar 2021.
Trump përfundimisht qëndroi larg ceremonisë së betimit të Bidenit më vonë atë muaj, duke thyer traditën. Ai u largua nga Shtëpia e Bardhë disa orë para inaugurimit.
Trump kandidon kundër demokrates Kamala Harris në zgjedhjet presidenciale të 5 nëntorit. Ai hodhi dyshime mbi integritetin e zgjedhjeve të ardhshme.
