Trajneri i Juventus, Thiago Motta, ka thënë se skuadra e drejtuar nga ai do të japë më shumë se maksimumin përballë Lille, një ekip që ka surprizuar të gjithë me fitoret ndaj Real Madrid dhe Atletico Madrid.
Sfida do të zhvillohet të martën në “Stade Pierre Mauroy” në kuadër të Champions League.
“Të gjitha ndeshjet janë të rëndësishme. Ne, si Juventus, gjithmonë duam të fitojmë”, ka thënë Motta, duke nënvizuar se përkushtimi maksimal dhe përmirësimi i vazhdueshëm janë objektiva kryesore. “Lille ka shumë vetëbesim dhe synojmë të japim më shumë se maksimumin tonë”.
Ai ka theksuar se nuk ka favorit në kuptimin se kush e fiton ndeshjen.
“Nuk ka favoritë në një ndeshje”, është shprehur Motta. “Është një lojë e bukur, në një stadium të bukur, dhe shpresojmë që fusha të jetë në gjendje të mirë nesër”.
