Dhjetë raste të dhunës në familje i ka raportuar policia në 24 orët e fundit, e ku pesë prej tyre kanë ndodhur vetëm në rajonin e Prishtinës.
Sipas raportit policor në Prishtinë është arrestuar e dërguar në mbajtje i dyshuari pasi që kishte sulmuar bashkëshorten, e cila si shkak i dhunës ka pranuar edhe tretman mjekësor.
Bashkëshorten e sulmoi edhe një tjetër i dyshuar në Prishtinë që gjithashtu përfundoi në pranga të policisë. Sipas njoftimit, viktima shtetase e Arabisë Saudite ka pranuar tretman mjekësor e i dyshuari u dërgua në mbajtje.
Dhunë nga bashkëshorti pati edhe një grua në Fushë Kosovë, për çka pranoi edhe tretman mjekësor. Madje sipas policisë i dyshuari që thuhet se u fjalosë edhe me familjarët e bashkëshortes ka shtënë edhe me armë zjarri, e që më pas të njëjtën e ka hedhur nga dritarja. Policia në vendin e ngjarjes ka gjetur dhe konfiskuar një pistolete me gaz, një karikator dhe 34 fishekë të kalibrit 9 milimetërsh. Me vendim të prokurorit, i dyshuari është dërguar në mbajtje.
Një tjetër rast i sulmit është regjistruar në Prishtinë, ku viktima është sulmuar nga vëllai i saj. Thuhet se viktima ka pranuar tretman mjekësor, derisa rasti shkon me procedurë të rregullt me vendim të prokurorit.
Ndërsa, përmes një raporti shtesë policia ka njoftuar se ka arrestuar të dyshuarin mashkull kosovar dhe pas intervistimit i njëjti është dërguar në mbajtje, derisa rasti ka të bëjë me një denoncim të datës 2 të këtij muaji për dhunë në familje.
Ndërkohë, në Shtërpcë është arrestuar e dërguar në mbajtje i dyshuari i cili u raportua nga bashkëshortja e tij se ka thyer urdhrin e gjykatës.
Në Pejë është arrestuar i dyshuari mashkull kosovar, pasi që i njëjti ka shkaktuar dhunë psikike ndaj bashkëshortes së tij. Me vendim të prokurorit pas intervistimit i dyshuari është liruar në procedurë të rregullt.
Por, në mbajtje është dërguar një burrë në Gjakovë që dyshohet se sulmoi fizikisht bashkëshorten e tij.
Njëjtë prapa grilave përfundoi edhe i dyshuari në Malishevë që sipas raportit u arrestua nën dyshimin se sulmoi fizikisht bashkëshorten e tij e cila ka pranuar edhe tretman mjekësor.
Ndërkohë, po në Malishevë viktima ka raportuar në polici ish-bashkëshortin e saj për kërcënim përmes rrjeteve sociale. Prokurori është i njoftuar tashmë për këtë rast për të cilin po vazhdojnë hetimet.
